مقاله

بدخشان کې د سرحدي ځواکونو او وسله‌ والو ترمنځ نښته؛ ځايي چارواکي د وسله‌والو د شاتګ خبر ورکوي

اشتراک گذاری:

بریانیوز - جمعه، ۲ اسد ١٤٠٥

ځايي مسوولان وایي، د پنجشنبې په ورځ د بدخشان ولایت د زیباک ولسوالۍ د توپ‌خانې په سیمه کې د اسلامي امارت د سرحدي ځواکونو او یوې وسله‌والې ډلې ترمنځ نښته شوې ده

د چارواکو په وینا، دغه وسله‌وال غوښتل د کوزې پښتونخوا د چترال له لارې د بدخشان ولایت خاورې ته داخل شي، خو د سرحدي ځواکونو له مقاومت سره مخ شول

په بدخشان کې د عمر ثالث فرقې ویاند نورالله نظري طلوع‌نیوز ته ویلي، سرحدي ځواکونو د دغو وسله‌والو د ننوتلو هڅه شنډه کړه. د هغه په خبره، په نښته کې څو تنه وسله‌وال وژل شوي او ټپیان شوي، او یو شمېر نور بېرته د چترال لوري ته په شا تللي دي

نظري د وسله‌والو د هویت او همدارنګه د وژل شویو او ټپیانو د دقیق شمېر په اړه نور معلومات نه دي ورکړي، خو ویلي یې دي چې نښتې د تېرې شپې تر ناوخته دوام درلود

تر اوسه د دې پېښې په اړه د پاکستاني چارواکو یا کومې وسله‌والې ډلې له لوري رسمي غبرګون نه دی خپور شوی، او د یادو ادعاوو خپلواکه تایید هم نه دی شوی