سفر

واشنګټن : په امریکا کې افغان کډوال د حکومت د نوې ارزونې له پلان څخه اندېښمن دي

اشتراک گذاری:

بریانیوز - شنبه، ۳ اسد ١٤٠٥

په امریکا کې یو شمېر افغان کډوال او د کډوالو د حقونو ملاتړي د فدرالي حکومت د هغه راپور شوي پلان په اړه اندېښنه څرګندوي چې له مخې یې ټاکل شوې له شاوخوا ۸۰۰ افغان کډوالو سره ځانګړې مرکې ترسره شي

د راپورونو له مخې، په دغو مرکو کې به د کډوالو د هویت، په امریکايي ټولنه کې د ادغام، د کورنۍ د غړو د کډوالۍ وضعیت او نورو اړوندو موضوعاتو په اړه پوښتنې وشي. ویل کېږي چې د دغو مرکو پر مهال راټول شوي مالومات به تر ۱۵ کلونو پورې خوندي وساتل شي

د کډوالو د حقونو یو شمېر فعالان اندېښنه لري چې دا بهیر ښايي په راتلونکي کې د ځینو افغان کډوالو د قانوني وضعیت پر ارزونه اغېز وکړي او آن د هغوی د احتمالي ایستلو لپاره هم وکارول شي

تر اوسه د امریکا فدرالي حکومت په رسمي ډول نه دي ویلي چې د دغو مرکو موخه د افغان کډوالو ایستل دي، خو د کډوالو ملاتړي بنسټونه د بهیر د روڼتیا او د کډوالو د قانوني حقونو د خوندي کېدو غوښتنه کوي