مقاله

سفیر: له پاکستانه د افغانانو د باعزته ستنېدو لپاره هڅې روانې دي

اشتراک گذاری:

بریانیوز - شنبه، ۳ اسد ١٤٠٥

په اسلام‌اباد کې د افغانستان د اسلامي امارت سفیر وایي، د افغان کډوالو د وضعیت په اړه یې له پاکستاني چارواکو، په ځانګړي ډول د خیبر پښتونخوا له اعلی وزیر سره خبرې کړې دي، څو له پاکستانه د افغانانو د ستنېدو بهیر په منظم، اسانه او باعزته ډول ترسره شي

سفیر طلوع‌نیوز ته ویلي، اسلامي امارت هڅه کوي چې له پاکستانه د افغان کډوالو د وتلو پر مهال او افغانستان ته د رسېدو وروسته د هغوی ستونزې راکمې کړي او د دې موضوع د ښه مدیریت لپاره له اړوندو لورو سره همغږي روانه ده

نوموړي زیاته کړې چې د افغان کډوالو د بېرته ستنېدو په بهیر کې د اسانتیاوو برابرول، د هغوی د ستونزو حل او د منظم انتقال لپاره خبرې اترې دوام لري

دا څرګندونې په داسې حال کې کېږي چې په وروستیو میاشتو کې له پاکستانه د افغان کډوالو د ستنېدو لړۍ چټکه شوې او ګڼ شمېر کورنۍ د تورخم، سپین‌بولدک او نورو لارو افغانستان ته راستانه شوې دي

د کډوالو د چارو مسئولان وایي، د راستنېدونکو کورنیو د ځای پر ځای کولو، لومړنیو اړتیاوو پوره کولو او د هغوی د ملاتړ لپاره هڅې روانې دي