کابل : د اقلیم بدلون، ځنګلونو وهل او کمزوری مدیریت د افغانستان د سیلابونو زیانونه زیات کړي

اشتراک گذاری:

بریانیوز - شنبه، ۳ اسد ١٤٠٥

د افغانستان په بېلابېلو ولایتونو کې وروستیو کلونو کې د سختو سیلابونو زیاتوالي اندېښنې راپورته کړې دي، چې د اقلیم بدلون، د ځنګلونو بې‌رویه وهل او کمزوری اداري مدیریت یې د زیانونو د زیاتېدو مهم لاملونه بلل کېږي

د چاپېریال ساتنې کارپوهان وایي، د تودوخې د درجې لوړېدل او د بارانونو غیرمنظم کېدل د دې لامل شوي چې سیلابونه ناڅاپي او ویجاړونکي بڼه خپله کړي. د دوی په وینا، د طبیعي ځنګلونو له منځه تلل د اوبو د جذب طبیعي سیستم کمزوری کړی او د سېلابونو شدت یې زیات کړی دی

د سیمه‌ییزو ادارو د معلوماتو له مخې، په ډېرو سیمو کې د سیلابونو پر وړاندې د مخنیوي بنسټیزې پروژې نه دي عملي شوي، او د اوبو د مدیریت کمزوري سیستم د خلکو زیانونه نور هم زیات کړي دي

کارپوهان ټینګار کوي چې که د ځنګلونو د بیا احیا، د اوبو د مدیریت د عصري سیستمونو جوړولو او د اقلیمي بدلون پر وړاندې د ملي تګلارو عملي کېدو ته جدي پاملرنه ونه شي، نو د سیلابونو زیانونه به لا پسې زیات شي

افغانستان د اقلیمي بدلون له اغېزو څخه تر ټولو زیانمنو هېوادونو څخه ګڼل کېږي، چې هر کال زرګونه کورنۍ د طبیعي پېښو له امله له سختو ستونزو سره مخ کېږي