مقاله

اسلام‌اباد : پاکستان کې د چینايي وګړو د ساتنې لپاره د زرهي موټرو د پېرلو پلان

اشتراک گذاری:

بریانیوز - شنبه، ۳ اسد ١٤٠٥

د پاکستان حکومت پرېکړه کړې چې په دغه هېواد کې مېشتو چینايي وګړو او کارکوونکو ته د لا زیات امنیت د برابرولو لپاره لسګونه زرهي موټرې وپېري

د پاکستان د پلان او پراختیا وزارت ویلي، هغه چینايي وګړي چې په بېلابېلو پرمختیايي پروژو کې کار کوي او لرې پرتو یا ستونزمنو سیمو ته سفر کوي، د ځانګړو امنیتي تدابیرو لاندې به وي

د وزارت د معلوماتو له مخې، د امنیتي تدابیرو په ترڅ کې به د چینايي وګړو د تګ راتګ لپاره زرهي وسایط برابر شي او د اړتیا پر مهال به د دوی د ساتنې او انتقال لپاره دوه‌څرخې وسایط هم ورسره ملګري وي

پاکستان دا ګام په داسې حال کې اخلي چې په وروستیو کلونو کې پر چینايي کارکوونکو او د چین اړوندو پروژو د بریدونو پېښې رامنځته شوې دي. اسلام‌اباد هڅه کوي د چینايي وګړو د امنیت د ټینګښت له لارې د دواړو هېوادونو ترمنځ د اقتصادي همکاریو دوام خوندي کړي

چین د پاکستان له مهمو اقتصادي شریکانو څخه دی او د چین ـ پاکستان اقتصادي دهلېز په ګډون په ګڼو لویو پروژو کې پانګونه لري