سیاست

شهباز شریف: پاکستان له افغانستان سره ښې اړیکې غواړي، خو د امنیت غوښتنه کوي

اشتراک گذاری:

بریانیوز - شنبه، ۳ اسد ١٤٠٥

اسلام‌اباد – د پاکستان لومړي وزیر شهباز شریف ویلي، اسلام‌اباد لا هم له افغانستان سره د ښو او دوستانه اړیکو غوښتونکی دی، خو له اسلامي امارت غواړي چې اجازه ورنه کړي د افغانستان خاوره د پاکستان پر ضد د ترهګریزو بریدونو لپاره وکارول شي

شهباز شریف دا څرګندونې د جمعې په ورځ په اسلام‌اباد کې د بلوچستان ملي کارغونډې ته د وینا پر مهال کړې دي. نوموړي ویلي، پاکستان له افغانستان سره شاوخوا دوه زره کیلومتره ګډه پوله لري او دواړه هېوادونه ګاونډیان دي چې باید په سوله او همغږۍ کې یو ځای ژوند وکړي

هغه زیاته کړې: «موږ له افغانستان سره ګډه پوله لرو، ګاونډیان یو او باید د یو بل ترڅنګ ژوند وکړو، خو له طالبانو بیا هم غوښتنه کوو چې اجازه ورنه کړي د افغانستان خاوره د پاکستان پر ضد د ترهګرۍ لپاره وکارول شي

د پاکستان لومړي وزیر یو ځل بیا ټینګار کړی چې د دواړو هېوادونو ترمنځ د اړیکو د ښه والي لپاره امنیتي همکاري او د ګډو ګواښونو پر وړاندې مبارزه مهمه ده

دا څرګندونې په داسې حال کې کېږي چې د کابل او اسلام‌اباد ترمنځ د امنیتي مسایلو، سرحدي پېښو او د وسله‌والو ډلو د فعالیتونو په اړه وخت ناوخت اختلافات راپورته کېږي