کابل او تاشکند : د ستراتېژیک اقتصادي مشارکت پر لور؛ اوزبېکستان په کانونو پانګونه او د ۵۰ میلیونه ډالرو فابریکې جوړولو ته چمتووالی وښود

کابل او تاشکند : د ستراتېژیک اقتصادي مشارکت پر لور؛ اوزبېکستان په کانونو پانګونه او د ۵۰ میلیونه ډالرو فابریکې جوړولو ته چمتووالی وښود

بریانیوز - دوشنبه، ۵ اسد ١٤٠٥

د اسلامي امارت د ریاست‌الوزرا اقتصادي مرستیال، ملا عبدالغني برادر، د دوشنبې په ورځ په ارګ کې د اوزبېکستان د لومړي وزیر له مرستیال، جمشید خواجه‌یف، او مل پلاوي سره په لیدنه کې د دواړو هېوادونو ترمنځ د اقتصادي، سوداګریزو، پانګونې او ټرانزیټي همکاریو د پراختیا پر لارو چارو خبرې وکړې

ملا عبدالغني برادر وویل، د کابل او تاشکند د اړیکو پراختیا نه یوازې د دواړو هېوادونو اقتصادي ګټې خوندي کوي، بلکې د سیمې د ثبات او هوساینې لپاره هم مهم ارزښت لري. هغه ټینګار وکړ چې اسلامي امارت چمتو دی د شته فرصتونو په کارولو سره دوه‌اړخیزې اړیکې لا پیاوړې کړي

نوموړي د دواړو هېوادونو ترمنځ د ګډ کاري پروګرام پر اغېزمن پلي کېدو ټینګار وکړ او د صادراتي بار وړونکو موټرو د تګ راتګ اسانتیا، د افغانستان د ټرانزیټي توکو لپاره د معافیتونو پراخول، د کرنیزو محصولاتو، تازه او وچو مېوو، خوراکي توکو او قیمتي کانیزو موادو د صادراتو زیاتوالی، د ټرانزیټي زیربناوو او ګمرکونو پراختیا، د ویزو اسانتیا او د انرژۍ او بنسټیزو پروژو په برخه کې ګډه همکاري د دواړو هېوادونو د اړیکو مهم لومړیتوبونه وبلل

هغه زیاته کړه، د افغانستان او اوزبېکستان د همکاریو پراختیا به دوه‌اړخیزې اقتصادي اړیکې نوي پړاو ته ورسوي او د سیمې د هېوادونو لپاره به د ښه ګاونډیتوب یوه بریالۍ بېلګه هم وي

په همدې حال کې، د اوزبېکستان د لومړي وزیر مرستیال، جمشید خواجه‌یف، وویل چې هېواد یې چمتو دی د افغانستان د کانونو په بېلابېلو برخو کې پانګونه وکړي او له افغانستان څخه د غوښې او پنبې واردات هم زیات کړي

هغه همدارنګه اعلان وکړ چې اوزبېکستان د ۵۰ میلیونه ډالرو په ارزښت په حیرتان کې د «جست» د ډبرو د پروسس فابریکې جوړولو ته چمتو دی

خواجه‌یف زیاته کړه، د اوزبېکستان پلاوی به د ټرانسپورټ، انرژۍ، کرنې، بانکدارۍ، سوداګرۍ، اقتصادي اړیکو او د افغانانو د مسلکي وړتیاوو د لوړولو په برخو کې له اړوندو افغان ادارو سره خپلې ګډې همکارۍ پراخې کړي