افغان کډوال : کندوز ته د ۱۶ زرو کډوالو کورنیو ستنېدل؛ د استوګنې د نومرو غوښتنه کوي

اشتراک گذاری:

بریانیوز/ شنبه( ۱۷ / اسد /۱۴۰۵هـ.ش)

کندوز – د طالبانو د کډوالو چارو ریاست وایي، د روان کال له پیل راهیسې شاوخوا ۱۶ زره کډوالې کورنۍ له ایران او پاکستان څخه بېرته کندوز ته ستنې شوې دي

د دغه ریاست مشر عبدالولي محمدي ویلي، یادې کورنۍ د وري او زمري میاشتو ترمنځ کندوز ته رسېدلې دي او اوس د دایمي استوګنې لپاره د ځمکو د نومرو د وېش غوښتنه کوي

د نوموړي په وینا، د کډوالو د زیات شمېر راستنېدل د ولایت پر موجودو امکاناتو او خدماتو فشار زیات کړی او د راستنېدونکو کورنیو لپاره د سرپناه او نورو لومړنیو اړتیاوو برابرول له مهمو ننګونو څخه دي

بلخوا، د ملګرو ملتونو په راپورونو کې ویل شوي چې افغانستان ته د کډوالو او بې‌ځایه شویو کسانو د بېرته ستنېدو چټک بهیر د هېواد روان بشري وضعیت لا پسې سخت کړی دی

ملګري ملتونه خبرداری ورکوي چې د راستنېدونکو د شمېر زیاتوالی پر عامه خدمتونو، سرپناه او د کار پر بازار د پام وړ فشار اچوي، په ځانګړي ډول په هغو ولایتونو کې چې له وړاندې له اقتصادي او بشري ستونزو سره مخ دي