تعلیم

کابل پوهنتون کې د منفک شویو استادانو شمېر ۳۰ تنو ته ورسېد

اشتراک گذاری:

بریانیوز جمعه ( ۶/ سنبله /۱۴۰۵هـ.ش)

کابل پوهنتون څخه د استادانو د منفک کولو لړۍ دوام لري او تازه د منفک شویو استادانو شمېر ۳۰ تنو ته رسېدلی دی

د دغو استادانو په وینا، څو میاشتې وړاندې د دعوت او ارشاد ریاست یوه پلاوي د کابل پوهنتون له بېلابېلو برخو لیدنه کړې وه او د استادانو د ظاهري بڼې، سیاسي دریځ او پخوانۍ فکري سابقې په اړه یې معلومات راټول کړي وو

استادان ادعا کوي چې یو شمېر یې د ږیرې نه پرېښودلو، د واکمنې ډلې د ملاتړ نه کولو او د تېرې فکري سابقې په پلمه تر څارنې لاندې نیول شوي او وروسته له دندو منفک شوي دي

دوی وايي، د منفک کېدو پرېکړې د دوی پر مسلکي او علمي فعالیتونو نه، بلکې پر شخصي بڼه او فکري دریځونو ولاړې دي او دا وضعیت د پوهنتونونو پر علمي چاپېریال منفي اغېز کولی شي

د کابل پوهنتون د استادانو د منفک کېدو په اړه تر اوسه د طالبانو اړوندو ادارو له لوري د ټولو ادعاوو په اړه څرګند وضاحت نه دی ورکړل شوی

د پوهنتونونو د استادانو د دندو د دوام او منفک کېدو موضوع په داسې حال کې راپورته کېږي چې په افغانستان کې د لوړو زده‌کړو پر نظام د سیاسي او فکري محدودیتونو په اړه له وړاندې هم اندېښنې موجودې دي

منتقدین وايي، پوهنتونونه باید د علمي بحث، مسلکي وړتیا او آزاد فکر لپاره خوندي چاپېریال ولري او د استادانو د ګوښه کولو پرېکړې باید د روښانه او مسلکي معیارونو پر بنسټ ترسره شي