کابل نجونې: د محدودیتونو سربېره د خپل راتلونکي لپاره مبارزه کوو

کابل نجونې: د محدودیتونو سربېره د خپل راتلونکي لپاره مبارزه کوو

 بریانیوز جمعه ( ۶/ سنبله /۱۴۰۵هـ.ش)

 د کابل یو شمېر نجونې وايي، په افغانستان کې د طالبانو له بیا واکمنېدو وروسته د ښځو او نجونو د زده‌کړو او کار فرصتونه په بې‌ساري ډول محدود شوي، خو دوی لا هم د خپل راتلونکي لپاره له هڅو لاس نه دی اخیستی

دغو نجونو ویلي، د زده‌کړو او کار په برخه کې پرله‌پسې محدودیتونو د دوی د ژوند پر مهمو برخو اغېز کړی او د راتلونکي په اړه یې اندېښنې زیاتې کړې دي

دوی وايي، له دې ټولو ستونزو سره سره هڅه کوي خپلې زده‌کړې او مسلکي وړتیاوې د شته امکاناتو له لارې پیاوړې کړي، څو له فرصتونو څخه د برخمنېدو لپاره چمتو پاتې شي

یوه شمېر کابلۍ نجونې ټینګار کوي چې زده‌کړه یوازې د شخصي پرمختګ وسیله نه ده، بلکې د ټولنې د اقتصادي او ټولنیز پرمختګ لپاره هم مهمه ده. د دوی په باور، د ښځو او نجونو له زده‌کړو او کار څخه محرومول د افغانستان د راتلونکي پر پرمختګ مستقیم اغېز کولی شي

د کابل نجونې وايي، سره له دې چې د دوی پر وړاندې د فرصتونو دروازې ډېرې محدودې شوې دي، خو نه غواړي خپلې هیلې له لاسه ورکړي او د خپل راتلونکي لپاره به د زده‌کړې، مهارتونو او نورو شته لارو له لارې خپلو هڅو ته دوام ورکړي

د ښځو او نجونو د زده‌کړو او کار په اړه محدودیتونه په داسې حال کې دوام لري چې د بشري حقونو نړیوال بنسټونه او د ملګرو ملتونو ادارې له طالبانو په وار وار غوښتي چې د ښځو او نجونو د زده‌کړې او کار حقونه بېرته خوندي کړي