اقتصاد

میاخېل: له ایراني سفیر سره د افغان صرافانو لیدنه دې وڅېړل شي

اشتراک گذاری:

بریانیوز جمعه ( ۶/ سنبله /۱۴۰۵هـ.ش)

کابل — د افغانستان د پخواني حکومت د دفاع وزارت سرپرست وزیر شاه محمود میاخېل وايي، د ایران د سفیر او د کابل د شهزاده سرای د صرافانو ترمنځ وروستۍ لیدنه د افغانستان د غیررسمي مالي نظام او اقتصادي وضعیت له پلوه جدي څېړنې ته اړتیا لري

میاخېل ویلي، په داسې حال کې چې د افغانستان په مالي نظام کې د صرافانو او حواله‌يي شبکو رول مهم شوی، له افغان صرافانو سره د بهرني هېواد د لوړپوړي ډیپلومات ناسته باید له اقتصادي پلوه په دقت وکتل شي.

نوموړي اندېښنه څرګنده کړې چې که د دې ناستې موخه له افغانستان څخه ایران ته د ډالرو د لېږد لپاره د اسانتیاوو برابرول وي، نو ښايي د افغانستان پر اقتصادي وضعیت او د افغانیو پر ثبات منفي اغېز وکړي

میاخېل د خپلې پخوانۍ تجربې په یادولو سره ویلي، د بهرنیو اسعارو د وتلو بهیر کولی شي د هېواد پر مالي بازار او د ملي اسعارو پر ارزښت مستقیم اغېز ولري

دا څرګندونې وروسته له هغې کېږي چې د ایران سفیر علیرضا بیکدلي په کابل کې د شهزاده سرای له صرافانو سره لیدلي دي. تر اوسه د دې ناستې د ټولو جزیاتو او مشخصو پایلو په اړه رسمي معلومات نه دي خپاره شوي