مقاله

پاکستاني قاضي: پاکستان له افغانستان سره د جګړې په حالت کې دی

اشتراک گذاری:

بریانیوز شنبه ( ۷/ سنبله /۱۴۰۵هـ.ش)

د اسلام‌اباد د سترې محکمې قاضي خادم حسین سومرو د افغان محصلینو د ویزو د تمدید د قضیې د اورېدنې پر مهال ویلي چې پاکستان له افغانستان سره د جګړې په حالت کې دی او افغانستان یې «دښمن هېواد» بللی دی

دغه څرګندونې د هغې قضیې د اورېدنې پر مهال شوې چې ۸۷ افغان محصلینو د خپلو ویزو د تمدید لپاره محکمې ته عریضه کړې ده

د محصلینو مدافع وکیل ایمل خان مندوخېل ویلي، محکمې ته یې د محصلینو اړوند ټول لازم اسناد وړاندې کړي، خو قاضي د قضیې اورېدنه ځنډولې ده

د افغان محصلینو د ویزو د تمدید موضوع په داسې حال کې د پاکستان په محکمه کې مطرح کېږي چې د دواړو هېوادونو ترمنځ اړیکې د امنیتي او سیاسي اختلافاتو له امله ترینګلې شوې دي

د افغان محصلینو د اتحادیې په وینا، په پاکستان کې د افغان محصلینو د زده‌کړیزو ویزو د تمدید بهیر له اوږدې مودې راهیسې له ستونزو سره مخ دی او یو شمېر محصلین د ویزو د نشتوالي له امله د نیول کېدو او ایستل کېدو له ګواښ سره مخ دي

د محصلینو مدافع وکیلان وايي، د ویزو د تمدید موضوع باید له امنیتي او سیاسي اختلافاتو جلا وکتل شي، څو هغه افغان محصلین چې په پاکستان کې په قانوني ډول زده‌کړې کوي، له خپلو زده‌کړو پاتې نه شي