مقاله

کډوالۍ نړیوال سازمان : له ایران او پاکستانه افغانستان ته د ۶.۵ میلیونه افغانانو د ستنېدو راپور

اشتراک گذاری:

(بریانیوزپنجشنبه (۹/ میزان /۱۴۰۵هـ.ش

له ایران او پاکستانه افغانستان ته د افغان کډوالو د ستنېدو بهیر په تېرو کلونو کې په بې‌ساري ډول چټک شوی او د وروستیو شمېرو له مخې، د ۲۰۲۳ کال له سپټمبر راهیسې شاوخوا ۶.۵ میلیونه افغانان بېرته هېواد ته ستانه شوي دي

د کډوالۍ نړیوال سازمان په خپل وروستي راپور کې ویلي، د بېرته ستنېدونکو افغانانو په شمېر کې د پام وړ زیاتوالی تر ډېره وروسته له هغې رامنځته شو چې پاکستان په ۲۰۲۳ کال کې د بې‌اسناده افغان کډوالو د ایستلو پرېکړه اعلان کړه

د راپور له مخې، په ایران کې هم د افغان کډوالو د ایستلو لړۍ پراخه شوې او تر دې دمه شاوخوا دوه میلیونه افغانان له دغه هېواد څخه افغانستان ته ستانه یا ایستل شوي دي

د کډوالو د ستنېدو دومره لویه څپه په داسې حال کې رامنځته شوې چې افغانستان لا دمخه د بشري مرستو، اقتصادي ستونزو او د کار او استوګنې د محدودو امکاناتو له ننګونو سره مخ دی

د پراخو ستنېدونکو کورنیو راتګ د هېواد په بېلابېلو سیمو کې د بیا مېشتېدنې، سرپناه، روغتیا، زده‌کړو، کارموندنې او لومړنیو خدمتونو پر وړاندې فشار زیات کړی دی

د راپور له مخې، د دومره لوی شمېر راستنېدونکو د جذب لپاره د اوږدمهاله او منظم پلان نشتوالی کولی شي د هغوی د بیا ادغام بهیر لا ستونزمن کړي او پر کوربه ټولنو هم اضافي فشار واچوي