نرګس نهان: د اوسنیو سیاستونو له دوام سره په نړیوالو جوړښتونو کې د افغانستان ادغام ناشونی دی

اشتراک گذاری:

(بریانیوزجمعه(۱۰/ میزان /۱۴۰۵هـ.ش

د کانونو او پټرولیم پخوانۍ وزیره نرګس نهان وايي، د طالبانو د اوسنیو سیاستونو له امله په نړیوالو جوړښتونو کې د افغانستان ادغام له جدي خنډونو سره مخ دی

نوموړې په خپله اېکس پاڼه لیکلي چې د افغانستان د اوسني وضعیت تر ټولو دروند بار د هېواد پر ښځو او ځوانانو پرېوځي او د محدودیتونو دوام د هغوی پر ژوند او راتلونکي مستقیم اغېز کوي

نهان ټینګار کړی چې د طالبانو اوسنی چلند افغانستان له نړیوالې ټولنې څخه لا ډېر ګوښه کړی او د هېواد د نړیوالو اړیکو د پراختیا او په نړیوالو جوړښتونو کې د اغېزمن حضور زمینه یې محدوده کړې ده

د نوموړې په وینا، د افغانستان د نړیوال ادغام لپاره د هېواد دننه د ټولو وګړو د حقونو، په ځانګړي ډول د ښځو او ځوانانو د ونډې او اساسي حقونو موضوع مهمه ده

د افغانستان د نړیوال تعامل او د اوسني حکومت د نړیوال مشروعیت موضوع له هغه وخت راهیسې د بحث له مهمو مواردو څخه ده چې طالبان پر افغانستان واکمن شوي دي. په ورته وخت کې، د ښځو او نجونو پر زده‌کړو، کار او عامه ژوند د محدودیتونو له امله د بشري حقونو په برخه کې هم پراخې اندېښنې مطرح شوې دي