جنګیالیو په ملاتړ تورن کړل TTP پاکستان: طالبان د دوحې تړون په ماتولو او د

اسلام‌اباد – د پاکستان د اطلاعاتو وزیر، عطاالله طارر، د افغانستان پر واکمنو طالبانو تور لګولی چې د دوحې تړون یې مات کړی او د تحریک طالبان پاکستان (TTP) جنګیالیو ته یې پناه او ملاتړ ورکړی دی

طارر دا څرګندونې د سه‌شنبې په شپه، د تلې په ۲۸مه نېټه، په خپل X (پخواني ټویټر) حساب کې وکړې او ویې ویل چې طالبان د خپلو ژمنو خلاف، د هغو ترهګرو ډلو ملاتړ کوي چې د پاکستان ملي امنیت ته جدي ګواښ پېښوي

د نوموړي په وینا

طالبان د دوحې تړون له ژمنو سرغړونه کړې او د تحریک طالبان پاکستان غړو ته یې پناه، وسایل او ملاتړ برابر کړی. دا کړنې د پاکستان ملي امنیت ته مستقیم خطر جوړوي

طارر ټینګار وکړ چې اسلام‌اباد د طالبانو څخه تمه لري چې د خپلو نړیوالو ژمنو له مخې اجازه ورنه‌کړي چې د افغانستان خاوره د نورو هېوادونو پر ضد وکارول شي

په وروستیو میاشتو کې د پاکستان او د طالبانو ترمنځ اړیکې بې‌ساري ترینګلې شوې دياسلام‌اباد پر طالبانو تور پورې کړی چې د TTP جګړه‌ماران د افغانستان له خاورې پاکستان ته د بریدونو لپاره کاروي. خو طالبان دا تورونه ردوي او وایي چې د پاکستان امنیتي ستونزې د هغه هېواد کورنۍ مسئله ده

شنونکي خبرداری ورکوي چې که دواړه هېوادونه خپل اختلافات د خبرو له لارې حل نه‌کړي، نو د سیمې امنیتي وضعیت لا پسې خرابېدای شي او د سرحدي تاوتریخوالي پېښې زیاتېدلای شي

دغه تازه څرګندونې د سیمې د امنیتي فضا د لا زیات کړکېچ نښه ګڼل کېږي — داسې مهال چې دواړه هېوادونه د سرحدي بریدونو، کډوالو او ترهګرۍ پر سر له یو بل سره د نیوکو په اوږدو جنجالونو کې ښکېل دي