واشنګټن – نوی ډیلي : امريکا او هند د لس کلن ستر دفاعي تړون لاسليک کړ

واشنګټن – نوی ډیلي: امريکا او هند د خپلو دفاعي اړیکو د پیاوړتیا لپاره یو مهم او تاریخي ګام پورته کړ. د دواړو هېوادونو د دفاع وزیرانو د لس کلن ستر دفاعي تړون د لاسليکولو په مراسمو کې د واشنګټن په دفاع وزارت کې ګډون وکړ

د دې تړون له مخې، امريکا او هند به په ګډه د پوځي ټکنالوژۍ، وسلو تولید، استخباراتي همکارۍ او د سیمې د امنیت په برخه کې پراخې همکارۍ کوي. همدارنګه، دواړه هېوادونه به د ګډو پوځي تمرینونو او د پرمختللو دفاعي وسایلو د جوړولو لپاره ګډې پروژې پیل کړي

د هند د دفاع وزیر وویل، دا تړون به د هند د دفاعي سکتور د پیاوړتیا او د ځان‌بسیا په لور یو مهم ګام وي. هغه زیاته کړه:

موږ له امريکا سره داسې یو ستراتیژيک تړون لاسليک کړ چې نه یوازې به د هند امنیتي وړتیاوې زیاتې کړي، بلکې د سیمې د ثبات او ګډو ګټو لپاره به هم اغېزمن تمام شي

په ورته وخت کې، د امريکا د دفاع وزیر ټینګار وکړ چې دا تړون د دواړو هېوادونو د اوږدمهاله ملګرتیا نښه ده. هغه وویل، دا همکاري به د "آزاد او پرانستې هند-ارام سمندري سیمې" د خوندي ساتلو لپاره مهم رول ولوبوي

شنونکي باور لري چې د امريکا او هند دا لس کلن دفاعي تړون نه يوازې د دواړو هېوادونو نظامي اړیکې نوره هم ژوروي، بلکې د آسیا په سیمه کې به د قدرت توازن ته نوی رنګ ورکړي

دغه تړون په داسې وخت کې لاسليک شوی چې د چين نفوذ په سیمه کې د پراخېدو په حال کې دی، او هند هڅه کوي له لوېدیځو هېوادونو سره خپلې دفاعي اړیکې نوره هم غښتلې کړي