هند له طالبانو حکومت سره د کرنې د څېړنیز مرکز د جوړولو ژمنه وکړه

 د طالبانو د حکومت د کرنې، اوبو لګولو او مالدارۍ وزارت وایي، د هند سفارت په کابل کې ژمنه کړې چې په افغانستان کې به د کرنې په برخه کې یو عصري څېړنیز مرکز جوړ کړي

 د دغه وزارت د خبرپاڼې له مخې، د هند سفارت شارژدافیر کرن یادوف د پنجشنبې په ورځ له وزیر عطاءالله عمري سره لیدنه کړې، او د دواړو هېوادونو ترمنځ د کرنې، اوبو لګولو او مالدارۍ په برخو کې د همکارۍ د پراختیا، د افغان کرنیزو محصولاتو د صادراتو د زیاتوالي او له هنده د میخانیزه وسایلو او تجهیزاتو د واردولو په اړه خبرې کړې دي

هند له اوږدې مودې راهیسې د افغانستان په کرنیز سکتور کې مهم رول لوبولی دی. د طالبانو تر بیا واکمنېدو مخکې، هند د امریکا وروسته دویم ستر مرسته‌کوونکی هېواد و، چې د افغانستان د بیا رغونې او بنسټیزو پروژو په پیاوړتیا کې یې پراخ حضور درلود

 دغه هېواد هغه مهال د افغانستان لپاره د کرنیز پوهنتون د جوړولو، د خاورې د کیفیت د څېړنې او د کرنیزو محصولاتو د ښه‌والي لپاره د علمي همکاریو ژمنې کړې وې — او اوس یې دا تګلاره د طالبانو د حکومت تر سیوري لاندې بېرته راژوندۍ کړې ده

 د راپورونو له مخې، هند د طالبانو له چارواکو سره د اوبو د سرچینو د مدیریت او په ځانګړي ډول د کونړ پر سیند د بند د رغونې په برخه کې هم د ګډ کار چمتووالی ښودلی دی

 د سیاسي شنونکو په باور، دا ګام د هند له لوري د افغانستان پر وړاندې د واقعي او متوازنې پالیسۍ نښه ده، او ښايي د دواړو هېوادونو اقتصادي، تخنیکي او سیمه‌ییزې اړیکې یو ځل بیا پیاوړې کړي