مسکو –روسیې له طالبانو سره د پوځي خبرو اترو د ترسره کېدو خبر ور کړ

بریانیوز(پنجشنبه، ٩ دلو۱۴۰۴)  مسکو – د روسیې فدراسیون د دفاع وزارت اعلان کړی چې د دغه هېواد او د طالبانو د ادارې ترمنځ پوځي خبرې اترې ترسره شوې دي. د روسیې د دفاع وزارت د چهارشنبې په ورځ، د دلو ۸مه، په خپره کړې اعلامیه کې ویلي چې واسیلي اوسماکوف، د روسیې د دفاع وزارت مرستیال، د طالبانو د ادارې د دفاع وزارت له مرستیال محمد فرید سره، چې د ستراتیژۍ او پالیسۍ مسوولیت لري، لیدنه او خبرې کړې دي

 د یاد وزارت د معلوماتو له مخې، په دې ناسته کې د دواړو لورو ترمنځ د پوځي همکاریو اوسنی وضعیت او د راتلونکې د پراختیا امکان تر جدي بحث لاندې نیول شوی دی. اعلامیه زیاتوي چې خبرې اترې پر هغو برخو متمرکزې وې چې د دواړو لورو لپاره ځانګړې ستراتیژیکه او امنیتي ارزښت لري

د روسیې د دفاع وزارت ویلي، په دې لیدنه کې د سیمه‌ییز امنیت وضعیت، د ګواښونو پر وړاندې د دریځونو تبادله، او د همغږۍ هغه لارې چارې ارزول شوې چې کولی شي د ګډو اندېښنو د مدیریت سبب شي. که څه هم د همکارۍ د دقیقو جزئیاتو په اړه معلومات نه دي ورکړل شوي، خو د مسکو له لوري دا ټینګار شوی چې دا خبرې د متقابلې علاقې پر بنسټ ترسره شوې دي

 سیاسي شنونکي دا لیدنه د سیمې په بدلیدونکي امنیتي وضعیت کې مهم پرمختګ بولي. د دوی په باور، روسیه هڅه کوي له افغانستان سره، د طالبانو تر واکمنۍ لاندې، د اړیکو د نوو لارو پلټنه وکړي، څو د منځنۍ آسیا د امنیت، د ترهګرۍ د مخنیوي او د سرحدي ثبات په برخه کې خپلې اندېښنې راکمې کړي

په ورته وخت کې، د طالبانو اداره هم د نړیوالې انزوا د کمولو او د سیمه‌ییزو قدرتونو سره د اړیکو د پراخولو هڅې کوي. د پوځي کچې دا ډول لیدنې ښيي چې طالبان غواړي ځان د یو داسې لوري په توګه مطرح کړي چې کولی شي د امنیتي موضوعاتو په اړه خبرې او تعامل وکړي

که څه هم روسیې تر اوسه د طالبانو حکومت په رسمي ډول په رسمیت نه دی پېژندلی، خو وروستي تماسونه او غونډې ښيي چې مسکو له افغانستان سره د عملي تعامل سیاست غوره کړی دی. شنونکي وايي، دا تګلاره د روسیې د پراخې سیمه‌ییزې ستراتیژۍ برخه ده؛ هغه ستراتیژي چې موخه یې په لوېدیځه او منځنۍ آسیا کې د نفوذ ساتل او د امنیتي ګواښونو مخنیوی دی

دا پوځي خبرې اترې په داسې وخت کې ترسره کېږي چې افغانستان لا هم له اقتصادي ستونزو، سیاسي بې‌ثباتۍ او امنیتي ننګونو سره مخ دی، او د سیمې هېوادونه د دې وضعیت د اغېزو په اړه له نږدې څارنه کوي