واشنګټن – د امریکا ولسمشر، ډونالد ټرمپ: د چین سره سوداګریزې اړیکې د کاناډا او بریتانیا لپاره جدي خطر دی

بریانیوز(جمعه،٩ دلو۱۴۰۴) د امریکا ولسمشر، ډونالد ټرمپ، د جمعې په ورځ په خپلو څرګندونو کې پر کاناډا او بریتانیا سختې نیوکې وکړې او ټینګار یې وکړ چې دا هېوادونه باید له چین سره سوداګریزې اړیکې پراخې نه کړي. نوموړي دا ډول اړیکې «ډېرې خطرناکې» وبللې او خبرداری یې ورکړ چې له بیجینګ سره نږدې کېدل کولای شي د لوېدیځو هېوادونو اقتصادي او سیاسي ګټې له جدي ګواښ سره مخ کړي

ټرمپ دا څرګندونې د خپلې مېرمنې ملانیا ټرمپ د مستند فلم «ملانیا» د رونمایۍ او نندارې له مراسمو وړاندې خبریالانو ته وکړې. هغه وویل: «د بریتانیا لپاره دا کار ډېر خطرناک دی، خو زما په اند تر دې هم خطرناک دا ده چې کاناډا له چین سره سوداګریزې اړیکې جوړې کړي.» د امریکا ولسمشر زیاته کړه چې د کاناډا اوسنی اقتصادي وضعیت ښه نه دی او چین نه شي کولای د دې هېواد د ستونزو د حل لار وي

د ټرمپ په وینا، چین خپلې سوداګریزې اړیکې د خپلو ملي ګټو لپاره کاروي او هغه هېوادونه چې له بیجینګ سره ژور اقتصادي تړاو پیدا کوي، ورو ورو له سیاسي او اقتصادي فشارونو سره مخ کېږي. نوموړي ټینګار وکړ چې لوېدیځ متحدین باید د اوږدمهاله امنیت او اقتصادي خپلواکۍ په اړه جدي فکر وکړي او له داسې شریکانو سره احتیاط وکړي چې د هغوی پر وړاندې د باور پوښتنې شته

سیاسي شنونکي وايي، د ټرمپ دا څرګندونې د امریکا د «سخت دریځ» سیاست دوام ښيي، چې موخه یې د چین د نړیوال نفوذ محدودول دي. د دوی په باور، ټرمپ هڅه کوي کاناډا او بریتانیا د واشنګټن له ستراتېژیک لیدلوري سره همغږي وساتي او د چین پر وړاندې ګډ دریځ غوره کړي

کارپوهان زیاتوي، که څه هم چین د نړۍ له سترو سوداګریزو شریکانو څخه ګڼل کېږي، خو له دې هېواد سره نږدې اقتصادي اړیکې تل له سیاسي او امنیتي اندېښنو سره مل وي. د دوی په اند، د امریکا دا ډول څرګندونې ښيي چې د چین او لوېدیځ ترمنځ اقتصادي سیالي لا هم د نړیوال سیاست یوه مهمه او لانجمنه موضوع ده

دا څرګندونې په داسې حال کې مطرح کېږي، چې د چین، امریکا، کاناډا او بریتانیا ترمنځ سوداګریزې اړیکې د نړیوال اقتصاد مهمه برخه جوړوي، خو سیاسي اختلافونه او ستراتېژیکې سیالۍ یې راتلونکی لا هم له نامعلوم برخلیک سره مخ کړی دی