تهران — مرګونی توغندیز برید په تهران کې؛ د افغان کډوالې کورنۍ شپږ غړي ووژل شول

تهران — مرګونی توغندیز برید په تهران کې؛ د افغان کډوالې کورنۍ شپږ غړي ووژل شول

بریانیوز:(دوشنبه،۱۰ حمل۱۴۰۵)

 د ایراني رسنیو د راپورونو له مخې، د تهران ښار په سوېل کې د “ري” په استوګنیزه سیمه کې یو خونړی توغندیز برید شوی، چې له امله یې لږ تر لږه ۱۰ تنه خپل ژوند له لاسه ورکړی دی. د وژل شویو په منځ کې د یوې افغان کډوالې کورنۍ شپږ غړي هم شامل دي، چې دې پېښې د خلکو زړونه سخت ولړزول

د راپورونو له مخې، برید په داسې سیمه کې شوی چې ملکي وګړي پکې مېشت وو، او د چاودنې شدت دومره زیات و چې ګڼ کورونه ویجاړ شوي او بې ګناه خلک یې تر خاورو لاندې کړي دي. عیني شاهدان وایي، د پېښې وروسته سیمه د ویر، چیغو او ګډوډۍ ډکه وه، او ژغورنې ډلې هڅه کوله چې ټپیان له کنډوالو راوباسي

د معلوماتو له مخې، په وژل شویو کې ماشومان او ښځې هم شامل دي، چې دا پېښه یې لا زړه بوږنوونکې کړې ده. د ټپیانو شمېر هم د پام وړ ښودل شوی، خو کره شمېر یې تر اوسه نه دی اعلان شوی

که څه هم د برید د اصلي عامل په اړه رسمي جزئیات لا نه دي خپاره شوي، خو دا پېښه په داسې وخت کې رامنځته شوې چې په سیمه کې پوځي ترینګلتیاوې زیاتې شوې دي. شنونکي خبرداری ورکوي چې د دې ډول بریدونو دوام به ملکي وګړي، په ځانګړې توګه کډوال، له جدي خطرونو سره مخ کړي

ایران چې د میلیونونو افغان کډوالو کوربه هېواد دی، له کلونو راهیسې د دغو کډوالو لپاره د ژوند یو مهم مرکز پاتې شوی؛ خو وروستۍ پېښې ښيي چې ناامني او جګړې کولای شي د هغوی ژوند هره شېبه له ګواښ سره مخ کړي

بشري بنسټونه ټینګار کوي چې د جګړو ښکېلې خواوې باید د نړیوالو قوانینو درناوی وکړي او د ملکي وګړو خوندیتوب ته لومړیتوب ورکړي، ځکه چې د بې ګناه انسانانو مرګ د هېڅ ډول شخړې توجیه نه شي کېدای

دا پېښه یو ځل بیا دا تریخ حقیقت را په ګوته کوي چې جګړه تر ټولو دروند قیمت له ملکي خلکو، په ځانګړې توګه له بې دفاع کورنیو څخه اخلي