اسلام‌اباد — د پاکستان او ایران ترمنځ ډیپلوماتیکې هڅې؛ د جګړې د پای ته رسولو لپاره مهمې خبرې

 اسلام‌اباد — د پاکستان او ایران ترمنځ ډیپلوماتیکې هڅې؛ د جګړې د پای ته رسولو لپاره مهمې خبرې

بریانیوز:(دوشنبه،۱۰ حمل۱۴۰۵)

 د پاکستان لومړي وزیر شهباز شریف اعلان کړی چې له د ایران له ولسمشر مسعود پزشکیان سره یې په ټیلیفوني اړیکه کې د ډیپلوماتیکو هڅو پر پیاوړتیا خبرې کړې دي، څو د امریکا او ایران ترمنځ روانه جګړه پای ته ورسېږي

د پاکستان د حکومت له لوري په خپره شوې خبرپاڼه کې ویل شوي، چې په دې تماس کې دواړو مشرانو د سیمې د خرابېدونکي امنیتي وضعیت په اړه ژوره اندېښنه څرګنده کړه او ټینګار یې وکړ چې شخړې باید د خبرو اترو او سیاسي لارو له لارې حل شي، نه د جګړې له لارې

شهباز شریف ویلي چې پاکستان د سیمې د ثبات لپاره خپلې هڅې ګړندۍ کړې دي او چمتو دی چې د منځګړیتوب رول ولوبوي. هغه زیاته کړې چې جګړه نه یوازې د ښکېلو هېوادونو لپاره زیانمنه ده، بلکې د ټولې سیمې پر اقتصاد، امنیت او بشري وضعیت ناوړه اغېزې لري

له بلې خوا، مسعود پزشکیان هم د ډیپلوماتیکو لارو د پیاوړتیا هرکلی کړی او ټینګار یې کړی چې د ستونزو د حل لپاره سوله‌ ییزې لارې تر ټولو اغېزمنې دي. نوموړي د سیمه‌ییزو همکاریو پر اړتیا هم ټینګار کړی

سیاسي شنونکي باور لري چې دا ډول اړیکې کولی شي د تاوتریخوالي په کمولو کې مهم رول ولوبوي، په ځانګړې توګه په داسې وخت کې چې د ایالات متحده او ایران ترمنځ اړیکې تر بل هر وخت زیاتې ترینګلې شوې دي

د راپورونو له مخې، پاکستان هڅه کوي د خپلو ډیپلوماتیکو اړیکو له لارې د سیمې د کړکېچ د کمولو لپاره فعاله ونډه واخلي او د خبرو اترو لپاره مناسب چاپېریال برابر کړي

کارپوهان وایي، که دا هڅې دوام وکړي، ښایي د جګړې د پراخېدو مخه ونیول شي او د سیمې هېوادونه یو ځل بیا د سولې او ثبات پر لور حرکت وکړي