سیاست

ټرمپ: د ایران هوايي او سمندري ځواکونه مو له منځه وړي، که شرایط ونه منل شي نو لا سخت بریدونه به وشي

اشتراک گذاری:

بریانیوز:(پنجشنبه،۱۳حمل۱۴۰۵)

د امریکا ولسمشر ډونالډ ټرمپ په خپله وروستۍ وینا کې ادعا کړې چې د ایران هوايي او سمندري ځواکونه یې له منځه وړي او په وینا یې دا جګړه به ډېر ژر د امریکا په ګټه پای ته ورسېږي

هغه ویلي چې د روانو پوځي عملیاتو په ترڅ کې یې د ایران مهم نظامي توان سخت کمزوری کړی او د جګړې په ډګر کې یې “ستر پرمختګونه” ترلاسه کړي دي. د ټرمپ په وینا، د امریکا هدف د جګړې ژر ختمول دي، خو دا پای ته رسېدل باید د واشنګټن د شرایطو له مخې وي

هغه همدارنګه خبرداری ورکړی چې که ایران د امریکا شرایط ونه مني، نو په راتلونکو دوو اونیو کې به لا سخت او پراخ بریدونه ترسره شي. ټرمپ زیاته کړې چې د ایران د تېلو مرکزونه هم د احتمالي هدفونو په توګه په نښه کېدای شي، څو د دغه هېواد پر اقتصاد فشار زیات شي

د ټرمپ دا څرګندونې په داسې وخت کې شوي چې د ایران او امریکا ترمنځ ترینګلتیا لا پسې لوړه شوې او دواړه لوري د یو بل پر وړاندې سخت دریځونه خپل کړي دي. شنونکي وایي چې د وضعیت د لا خرابېدو احتمال شته او د سیمې ثبات له جدي ننګونو سره مخ دی