واشنګټن — د هرمز تنګي په بدل کې اوربند؛ د ډونالډ ټرمپ وړاندیز او د تاوتریخوالي د کمېدو هیلې

                                                                        واشنګټن — د هرمز تنګي په بدل کې اوربند؛ د ډونالډ ټرمپ وړاندیز او د تاوتریخوالي د کمېدو هیلې

                                                                                                                                                   بریا نیوز( چهارشنبه، ١٩ حمل ١٤٠٥) 

 د امریکا ولسمشر ډونالډ ټرمپ ویلي چې د پاکستان له مشرتابه سره تر مفصلو سلا مشورو وروسته دې پرېکړې ته رسېدلی چې که ایران د هرمز تنګی له لارې د بېړیو ازاد تګ راتګ ته اجازه ورکړي، نو د دواړو هېوادونو تر منځ به لنډمهالی اوربند ټینګ شي

نوموړي دا څرګندونې په خپله ټولنیزه رسنۍ   کې خپرې کړې دي او ویلي یې دي: «زه چمتو یم چې د دوو اوونیو لپاره پر ایران بریدونه او بمبارۍ وځنډوم.» د هغه په وینا، دا ګام د تاوتریخوالي د کمېدو لپاره یو مهم فرصت رامنځته کولای شي او د خبرو اترو دروازې پرانېستلای شي

د راپورونو له مخې، دا وړاندیز په داسې حال کې مطرح کېږي چې په سیمه کې کړکېچ ډېر شوی او نړیواله اندېښنه زیاته شوې ده. د هرمز تنګی، چې د نړۍ د انرژۍ د لېږد یوه مهمه لاره بلل کېږي، د وروستیو تاوتریخوالو له امله د احتمالي بندېدو له ګواښ سره مخ شوی، چې دا کار کولای شي نړیوال بازارونه اغېزمن کړي

شنونکي وایي چې د پاکستان منځګړیتوب په دې برخه کې مهم رول لوبولی دی، ځکه چې دغه هېواد د دواړو لورو سره اړیکې لري او هڅه کوي د خبرو اترو لپاره مناسب چاپېریال برابر کړي. د دوی په اند، که دا وړاندیز عملي شي، نو ښايي د سیمې د کړکېچ په کمېدو کې مرسته وکړي

تر اوسه د ایران له لوري د دې وړاندیز په اړه رسمي دریځ نه دی اعلان شوی، خو اټکل کېږي چې تهران به دا موضوع له خپلو ملي ګټو او امنیتي اندېښنو سره سم وارزوي

په ټوله کې، د ډونالډ ټرمپ دا وړاندیز د سولې لپاره یو احتمالي ګام بلل کېږي، خو بریا به یې په دې پورې تړلې وي چې دواړه لوري څومره انعطاف ښيي او ایا کولای شي له سیاسي اختلافاتو تېر شي او که نه