د اوربند تر سیوري لاندې شکونه: د امریکا او ایران ترمنځ نازک سکوت

 د اوربند تر سیوري لاندې شکونه: د امریکا او ایران ترمنځ نازک سکوت

بریانیوز:(جمعه ،۲۱ حمل۱۴۰۵)

په داسې حال کې چې د امریکا او ایران ترمنځ اوربند دویمې ورځې ته داخل شوی، د سولې دا لنډمهاله فضا لا هم له شکونو، فشارونو او سیاسي اختلافاتو ډکه ښکاري. دواړه لوري تر اوسه د هوکړې پر مهمو جزییاتو یو نظر ته نه دي رسېدلي، او دا حالت د اوربند راتلونکی له پوښتنو سره مخ کړی دی

د امریکا ولسمشر ډونالډ ترمپ په تازه څرګندونو کې ټینګار کړی چې د امریکا ټول پوځي ځواکونه به په سیمه کې پر خپل ځای پاتې شي، تر څو ایران د احتمالي وروستۍ هوکړې ټولو شرطونو ته غاړه کېږدي. هغه دا هم روښانه کړې چې واشنګټن به د هر ډول سرغړونې پر وړاندې چوپ پاتې نه شي

ټرمپ په توند خبرداري سره ویلي، که ایران له ژمنو سرغړونه وکړي، نو ښايي داسې درنه او پراخه جګړه پیل شي چې د پخوانیو نښتو پرتله به ډېره سخته وي. دا څرګندونې د دې ښکارندويي کوي چې که څه هم اوربند اعلان شوی، خو د بې‌ باورۍ فضا لا هم ژوره ده

له بلې خوا، د امریکا د ولسمشر مرستیال جی‌دی ونس ویلي چې ولسمشر له خپل مذاکراتي ټیم غوښتي څو د “حسن نیت” پر بنسټ هڅې وکړي، تر څو یوې پایدارې او عملي هوکړې ته ورسېږي. دا څرګندونه د دې هڅه ګڼل کېږي چې د خبرو اترو دروازه پرانستې وساتل شي، سره له دې چې سیاسي فشارونه زیات دي

سیاسي شنونکي باور لري چې اوسنی وضعیت د “سړې سولې” بڼه لري—یعنې جګړه درېدلې، خو باور نه دی رامنځته شوی

هره کوچنۍ تېروتنه کولای شي دا نازک توازن له منځه یوسي او سیمه یو ځل بیا د تاوتریخوالي پر لور بوځي

 په ټوله کې، دا اوربند د سولې پر لور یو احتیاطي ګام بلل کېږي، خو تر هغه چې دواړه لوري پر اساسي مسایلو توافق ونه کړي، د دې دوام به لا هم له جدي ننګونو سره مخ وي