مقاله

خلیلزاد: د منځنۍ او سویلي اسیا نږدې نښلېدنه د سیمې بڼه بدلولای شي

اشتراک گذاری:

بریانیوز(پنجشنبه، ۱۲ جوزا ١٤٠٥)

د افغانستان لپاره د امریکا پخواني ځانګړي استازي ویلي چې د منځنۍ او سویلي اسیا ترمنځ د لېږد رالېږد، مخابراتي اړیکو او انرژۍ د شبکو ژوره نښلېدنه کولی شي د سیمې لپاره بنسټیز بدلونونه رامنځته کړي

خلیلزاد ټینګار کړی چې د دغو سیمه‌ییزو شبکو پراختیا به نه یوازې اقتصادي ودې او سوداګرۍ ته نوې لارې پرانیزي، بلکې د اوږدمهاله ثبات او همکارۍ لپاره به هم پیاوړی بنسټ جوړ کړي

د هغه په وینا، د سیمې هېوادونه د جغرافیایي موقعیت، طبیعي سرچینو او بشري ظرفیتونو له پلوه ستر فرصتونه لري، خو د دغو فرصتونو بشپړ استعمال د پراخو سیمه‌ییزو همکاریو او نښلېدنې له پیاوړتیا سره تړاو لري

نوموړي زیاته کړې چې د ترانزیټي دهلېزونو، انرژۍ د لېږد پروژو او مخابراتي شبکو پراختیا کولی شي د هېوادونو ترمنځ اقتصادي اړیکې پیاوړې او د ګډو ګټو پر بنسټ نوې همکارۍ رامنځته کړي

شنونکي باور لري چې د منځنۍ او سویلي اسیا ترمنځ د نښلېدنې پراخې پروژې به د سوداګرۍ کچه لوړه کړي، پانګونه به زیاته کړي او د سیمې د هېوادونو ترمنځ به د متقابل باور او اقتصادي ثبات په ټینګښت کې مهم رول ولوبوي

د خلیلزاد دا څرګندونې په داسې وخت کې مطرح کېږي چې د سیمه‌ییز اتصال، ترانزیټ، انرژۍ او اقتصادي همکاریو په اړه بحثونه د سیمې د هېوادونو د اقتصادي تګلارو مهمه برخه ګرځېدلې ده