ښځو پر وړاندې نوي محدودیتونه؛ په تازه فرمان کې له برقع پرته ښځې له کوره وتلی نه شي

اشتراک گذاری:

د طالبانو مشر د هرات د امربالمعروف ریاست ته په تازه شفاهي فرمان کې امر کړی چې له برقع پرته د ښځو د تګ راتګ مخه ونیسي

بریانیوز- پنجشنبه، ١٤ جوز ١٤٠٥

بریا نیوز ته د رسېدلو معلوماتو له مخې، د طالبانو مشر، ملا هبت‌الله اخوندزاده، په یوه تازه شفاهي فرمان کې د هرات ولایت د امربالمعروف او نهی عن المنکر ریاست ته سپارښتنه کړې چې له دې وروسته دې ښځو ته له برقع پرته د کور څخه د وتلو اجازه ورنه کړل شي. د فرمان له مخې، هغه ښځې چې له برقع پرته په عامه ځایونو کې ولیدل شي، باید ونیول شي او قانوني چلند ورسره وشي.

د یاد فرمان د عملي کولو په موخه، نن د هرات ولایت د امربالمعروف او نهی عن المنکر ریاست کې یوه ځانګړې غونډه ترسره شوه. په غونډه کې د فرمان د پلي کولو لپاره د مناسب میکانیزم، څارنې او اجرایي کړنلارې د جوړولو په اړه بحثونه وشول او اړوندو مسؤلینو ته لازمې سپارښتنې وشوې.

همدارنګه، دې غونډې ته د هرات ولایت د حج او اوقافو ریاست یو شمېر علما او ملا امامان هم رابلل شوي وو، څو د یاد فرمان د تطبیق په برخه کې همغږي رامنځته شي او د جوماتونو او دیني مراکزو له لارې خلکو ته اړوندې لارښوونې ورسول شي.