یونیسف: په نورستان کې نږدې ۱۰ زره کسانو ته د پاکو اوبو لاسرسی برابر شو

اشتراک گذاری:

بریانیوز - دوشنبه، ١۵ سرطان ١٤٠٥

د ماشومانو د ملاتړ د ملګرو ملتونو صندوق (یونیسف) وایي، د اروپا د ټولنې د بشري مرستو د دفتر په ملاتړ، د افغانستان په نورستان ولایت کې نږدې ۱۰ زره کسان د څښاک پاکو او صحي اوبو ته لاسرسی موندلی دی

یونیسف ویلي چې دغه پروژه د اوبو رسولو د زېربناوو د پیاوړتیا او د خلکو د لومړنیو اړتیاوو د پوره کولو په موخه پلي شوې ده، چې په ځانګړي ډول د کلیو اوسېدونکو ته یې ګټه رسولې ده

د دې ادارې په وینا، د پاکو اوبو برابرول نه یوازې د روغتیايي ستونزو په کمېدو کې مهم رول لري، بلکې د اوبو له ککړتیا سره تړلې ناروغۍ هم په څرګند ډول راکموي، چې تر ډېره یې ماشومان او ښځې اغېزمنوي

یونیسف ټینګار کړی چې په افغانستان کې د اوبو، روغتیا او حفظ الصحې په برخه کې لا هم پراخې اړتیاوې شته او د دوامدارو مرستو پرته د ګڼو سیمو خلک له اساسي خدماتو بې‌برخې پاتې کېږي

دغه اداره زیاتوي چې د نړیوالو همکارانو په مرسته به هڅه دوام ولري څو په لرې پرتو سیمو کې د پاکو اوبو د لاسرسي شبکه لا پراخه شي او د خلکو د ژوند کیفیت لوړ شي