مقاله

ذبیح‌الله مجاهد: داعش په افغانستان کې له منځه تللې؛ د اندېښنې اړتیا نشته

اشتراک گذاری:

بریانیوز - جمعه ٢۶ سرطان ١٤٠٥

کابل – د اسلامي امارت ویاند ذبیح‌الله مجاهد د روسیې د بهرنیو چارو وزیر سرګي لاوروف د وروستیو څرګندونو په غبرګون کې ویلي، داعش ډله په افغانستان کې په بشپړه توګه ځپل شوې او نور په هېواد کې هېڅ فزیکي حضور نه لري

مجاهد طلوع‌نیوز ته ویلي، د اسلامي امارت امنیتي ځواکونه پر ټول افغانستان بشپړ کنټرول لري او د هېواد امنیت یې خوندي کړی دی. د هغه په وینا، ګاونډي او د سیمې هېوادونه باید د افغانستان د امنیتي وضعیت په اړه اندېښنه ونه لري

هغه زیاته کړه چې هېڅ وسله‌واله ډله نه شي کولای د افغانستان له خاورې د نورو هېوادونو پر ضد ګواښ رامنځته کړي او اسلامي امارت د هر ډول امنیتي ګواښ د مخنیوي توان لري

دا څرګندونې وروسته له هغې کېږي چې د روسیې د بهرنیو چارو وزیر سرګي لاوروف ویلي وو، مسکو په افغانستان کې د داعش د حضور او احتمالي پراختیا په اړه اندېښنه لري او د سیمې امنیت ته یې یو جدي ګواښ ګڼي

تر دې وړاندې هم اسلامي امارت په وار وار ټینګار کړی چې داعش یې سخت ځپلې او د دغې ډلې د فعالیتونو د مخنیوي لپاره یې پراخ امنیتي عملیات ترسره کړي دي