سفر

امریکا: د ټرمپ د دویمې دورې پر مهال د ۱۷۵ زره بهرنیو وګړو ویزې لغوه شوې

اشتراک گذاری:

بریانیوز/ پنجشنبه ( ۲۲ / اسد /۱۴۰۵هـ.ش)

واشنګټن – د امریکا د بهرنیو چارو وزیر وايي، د ولسمشر ډونالډ ټرمپ د دویمې دورې له پیل راهیسې د امنیتي او د کډوالۍ د قوانینو له مخې د شاوخوا ۱۷۵ زره بهرنیو وګړو امریکايي ویزې لغوه شوې دي

نوموړي ویلي، د امریکا ویزه لرل یو امتیاز دی، نه د هر کس قانوني حق؛ له همدې امله حکومت کولای شي د هېواد د امنیت او نافذه قوانینو پر بنسټ د ویزو په اړه پرېکړه وکړي

د امریکا د بهرنیو چارو وزیر ټینګار کړی چې د ویزو د لغوه کولو بهیر د هغو کسانو پر وړاندې ترسره کېږي چې د امریکا د امنیتي، کډوالۍ او نورو اړوندو قوانینو له معیارونو سره برابر نه وي

د ټرمپ ادارې له پیل راهیسې د کډوالۍ او ویزو په برخه کې د محدودیتونو د زیاتولو لپاره یو شمېر اقدامات کړي دي. د امریکا حکومت وايي، د دغو اقداماتو موخه د هېواد امنیت پیاوړی کول او د کډوالۍ د قوانینو اغېزمن تطبیق دی

د ویزو د پراخو لغوه کېدو موضوع په داسې حال کې مطرح کېږي چې د ټرمپ ادارې د بهرنیو وګړو د امریکا ته د سفر او د کډوالۍ د بهیر د لا سخت کنټرول لپاره خپلې پالیسۍ پراخې کړې دي