محمود صیقل: په بدخشان کې وروستیو تحولاتو د طالبانو دننه ژورې ستونزې په ډاګه کړې

محمود صیقل: په بدخشان کې وروستیو تحولاتو د طالبانو دننه ژورې ستونزې په ډاګه کړې

 بریانیوز/ جمعه ( ۲۳ / اسد /۱۴۰۵هـ.ش)

کابل – په ملګرو ملتونو کې د افغانستان پخواني استازي محمود صیقل ویلي، په بدخشان کې وروستیو تحولاتو ښودلې چې طالبان له دننه له جدي ننګونو او د «له منځه تللو له بهیر» سره مخ دي

صیقل د طالبانو د مخالفو جریانونو ترمنځ د پوځي همغږۍ او د سیمو د کنټرول لپاره د چمتووالي غوښتنه کړې ده. نوموړي ویلي، د اوسني وضعیت په مقابل کې د مخالفو ډلو ترمنځ همغږي او ګډ دریځ کولی شي مهم رول ولري

هغه زیاته کړې چې په تېره یوه موده کې د طالبانو د مخالفو سیاسي جریانونو ترمنځ د یوه ګډ سیاسي جوړښت پر سند د هوکړې لپاره جدي هڅې شوې دي

د صیقل څرګندونې په داسې مهال مطرح کېږي چې په بدخشان کې د طالبانو او د دغه ډلې د یوه ناراضي قوماندان، جمعه خان فاتح، ترمنځ د اختلافاتو او نښتو راپورونه ورکړل شوي دي

د راپورونو له مخې، د یادو نښتو او داخلي اختلافاتو له امله په سیمه کې امنیتي وضعیت یو ځل بیا د بحث موضوع ګرځېدلی دی

تر اوسه طالبانو د محمود صیقل د څرګندونو په اړه رسمي غبرګون نه دی ښودلی. طالبان په عمومي توګه د خپلو لیکو دننه د پراخو اختلافاتو ادعاوې ردوي او ټینګار کوي چې په هېواد کې امنیت او بشپړ کنټرول لري

د سیاسي شنونکو په باور، که د طالبانو په دننه کې اختلافات پراخ شي او له وسله‌والو مخالفو جریانونو سره یوځای شي، ښايي د افغانستان پر راتلونکي سیاسي او امنیتي وضعیت اغېز وکړي