د افغان کډوالو وتل : د پاکستان کرنه د کارګرانو له کمښت سره مخ شوې

د افغان کډوالو وتل؛ د پاکستان کرنه د کارګرانو له کمښت سره مخ شوې

 بریانیوزچهار شنبه ( ۲۶ / اسد /۱۴۰۵هـ.ش)

اسلام‌اباد – له پاکستانه د افغان کډوالو د ایستلو بهیر نه یوازې د زرګونو افغان کورنیو پر ژوند اغېز کړی، بلکې د پاکستان پر کرنیز سکتور یې هم د پام وړ فشار راوستی دی

په خیبر پښتونخوا، بلوچستان او پنجاب کې افغان کارګرو له کلونو راهیسې د کرنیزو ځمکو په چمتو کولو، کرکیله، د حاصلاتو راټولولو او نورو موسمي کارونو کې مهم رول درلود. د دوی ناڅاپي وتل د کروندګرو لپاره د کاري ځواک د کمښت ستونزه رامنځته کړې ده

افغان کروندګر دانیال احمد وايي، د افغان کډوالو له وتلو وروسته د ځمکو د اجارې بیې په څرګند ډول راټیټې شوې دي. د نوموړي په وینا، د کارګرانو کمښت د دې لامل شوی چې د کرنیزو ځمکو د کارونې او حاصلاتو په اړه اندېښنې زیاتې شي

د ځمکې مالک حارث خان هم وايي، که د حاصلاتو د راټولولو لپاره کافي کارګران پیدا نه شي، د کرنیزو محصولاتو یوه برخه د خرابېدو له جدي ګواښ سره مخ کېدای شي

د کرنې په برخه کې د موسمي کارګرانو اړتیا په ځانګړي ډول د حاصلاتو د راټولولو پر مهال لوړېږي. کروندګر اندېښنه لري چې د کارګرانو کمښت به د تولید لګښتونه لوړ او د حاصلاتو د راټولولو بهیر ورو کړي

افغان کارګرانو د پاکستان په کرنیز اقتصاد کې د اوږدې مودې لپاره ارزانه او مهم کاري ځواک برابر کړی و؛ خو د دوی د وتلو له زیاتېدو سره اوس د پاکستان په ځینو کرنیزو سیمو کې د کارګرانو د کمښت اغېزې د کروندګرو او د ځمکو د مالکانو لپاره په جدي اندېښنه بدلې شوې دي