سیاست

فضل‌الرحمن: د ډیورنډ کرښې سوداګر باید د کړکېچ قرباني نه شي

اشتراک گذاری:

بریانیوزچهار شنبه ( ۲۶ / اسد /۱۴۰۵هـ.ش)

اسلام‌اباد – د جمعیت علمای اسلام پاکستان مشر مولانا فضل‌الرحمن وايي، د ډیورنډ کرښې په اوږدو کې او پخوانیو قبایلي سیمو کې د سوداګرو کاروبارونه د افغانستان او پاکستان د روانو ستونزو له امله له جدي خنډونو سره مخ شوي دي

فضل‌الرحمن ټینګار کړی چې د دواړو هېوادونو د سیاسي او امنیتي اختلافاتو له امله باید سرحدي سوداګر او عام خلک قرباني نه شي، ځکه د دغو سیمو د ګڼو کورنیو اقتصادي ژوند له افغانستان سره پر سوداګرۍ او راکړې ورکړې پورې تړلی دی

نوموړي ویلي، د سرحدي لارو اوږدمهاله تړل کېدل نه یوازې سوداګرو ته مالي زیان رسوي، بلکې د دواړو غاړو د خلکو پر ورځني ژوند او سیمه‌ییز اقتصاد هم مستقیم اغېز کوي

د جمعیت علمای اسلام مشر له اړوندو چارواکو غوښتي چې د سوداګرو ستونزو ته جدي پاملرنه وکړي او داسې لارې چارې ومومي چې د امنیتي اندېښنو تر څنګ د قانوني سوداګرۍ او د خلکو د تګ راتګ بهیر هم خوندي پاتې شي

د افغانستان او پاکستان ترمنځ په وروستیو میاشتو کې د امنیتي اختلافاتو له زیاتېدو سره د دواړو هېوادونو ترمنځ یو شمېر مهمې لارې تړل شوې دي چې له امله یې سرحدي سوداګر او د ترانزیټ اړوند کاروبارونه له پراخو ستونزو سره مخ شوي دي