تعلیم

د خیبر پښتونخوا : د پېښور عالي محکمې د ۱۴ افغان طبي محصلانو د ایستلو بهیر وځنډاوه

اشتراک گذاری:

(بریانیوز سه شنبه (۳۱/ سنبله /۱۴۰۵هـ.ش

پېښور — د پېښور عالي محکمې د خیبر پښتونخوا په بېلابېلو پوهنتونونو کې د طب او غاښونو د طب په برخو کې د ۱۴ افغان محصلانو جبري ایستل په موقتي ډول درولي او اړوندو ادارو ته یې امر کړی چې په ۱۴ ورځو کې خپل لیکلی ځواب وړاندې کړي

یاد محصلان د افغان محصلانو د ځانګړې ونډې له لارې په یو شمېر طبي او د غاښونو د طب پوهنځیو کې منل شوي وو. دوی په خپله عریضه کې ویلي چې د دوی د زده‌کړو د منلو بهیر د قانوني لارو ترسره شوی او د پاکستان د لوړو زده‌کړو کمېسیون هم د ویزو د ترلاسه کولو لپاره د نه‌ممانعت سند ورکړی دی

د محصلانو وکیل محکمې ته ویلي چې د پاکستان د طب او غاښونو شورا له لوري د افغان محصلانو د منل کېدو د لغوه کولو پرېکړه له دې پرته شوې چې محصلانو ته د خپل دریځ د وړاندې کولو فرصت ورکړل شي

وکیل استدلال کړی چې دغه پرېکړه د پاکستان د اساسي قانون له ځینو مادو او نړیوالو ژمنو سره په ټکر کې ده

محکمې د موقتي حکم له لارې د ۱۴ افغان محصلانو جبري ایستل درولي او اجازه یې ورکړې چې د قضیې تر راتلونکې اورېدنې پورې خپلو زده‌کړو ته دوام ورکړي

ټاکل شوې د دې قضیې بله اورېدنه د اکتوبر په ۱۲مه ترسره شي، چې په ترڅ کې به د اړوندو ادارو لیکلي ځوابونه هم وڅېړل شي