د برېتانیا دفاع وزارت ۹۷ میلیونه نوي اسناد موندلي؛ د افغانستان د ځانګړو ځواکونو د وژنو پلټنه له ځنډ سره مخ کېدای شي

د برېتانیا دفاع وزارت شاوخوا ۹۷ میلیونه نوي اسناد موندلي چې ښايي په افغانستان کې د برېتانوي ځانګړو ځواکونو د احتمالي غیرقانوني وژنو د ادعاوو په اړه روانه خپلواکه پلټنه نوره هم وځنډوي.

بریانیوز- شنبه، ٤ میزان ١٤٠٥

د سکای نیوز د راپور له مخې، دغه خپلواکه پلټنه په افغانستان کې د ۲۰۱۰ او ۲۰۱۳ کلونو ترمنځ د برېتانوي ځانګړو ځواکونو د عملیاتو پر مهال د بې‌وسلو افغانانو د احتمالي وژنو او د دغو پېښو د پټولو په اړه د مطرح شویو ادعاوو څېړنه کوي.

راپور زیاتوي چې دغه پلټنه خپل څلورم کال ته داخله شوې او تر اوسه پرې د پام وړ لګښت شوی، پراخ شواهد راټول شوي او له ګڼو شاهدانو سره مرکې ترسره شوې دي.

د پلټنې مشر د ۹۷ میلیونه نویو اسنادو موندل «اندېښمنوونکي او د افسوس وړ» بللي او ویلي یې دي چې که د دغو اسنادو موضوع ژر حل نه شي، د پلټنې مهمې برخې به له ځنډ سره مخ شي.

د برېتانیا دفاع وزارت په یوه لیک کې پلټنې ته ویلي چې دغه اسناد د معلوماتو په یوه زېرمه کې د لومړنیو لټونونو پر مهال موندل شوي دي. د وزارت چارواکو د اړوندو اسنادو د پر وخت نه وړاندې کولو له امله بښنه غوښتې او ویلي یې دي چې له رامنځته شوې نیمګړتیا څخه خواشیني دي.

دا لومړی ځل نه دی چې د برېتانیا دفاع وزارت د دغې پلټنې لپاره د اسنادو د وړاندې کولو په برخه کې له ځنډ سره مخ کېږي. د پلټنې د پرمختللې مرحلې له امله اندېښنه شته چې د نویو اسنادو موندل به د شواهدو د ارزونې اړتیا زیاته او د پلټنې پر مهالوېش اغېز وکړي.

دغه قضیه د افغانستان د جګړې پر مهال د برېتانوي ځانګړو ځواکونو د عملیاتو په اړه د هغو ادعاوو څېړنه کوي چې پخوانیو سرتېرو او نورو سرچینو مطرح کړې دي. په دغو ادعاوو کې ویل شوي چې په ځینو عملیاتو کې ښايي بې‌وسلې افغانان وژل شوي وي. خو پلټنې تر اوسه د دغو ادعاوو په اړه وروستۍ پایله نه ده اعلان کړې او د شواهدو ارزونه لا هم روانه ده.