په هرات کې د طالبانو پر امنیتي پوسته چاودنه؛ پنځه کسان ټپیان شوی

اشتراک گذاری:

د بریانیوز د راپور له مخې، لږ تر لږه درې سرچینې وايي چې د دوشنبې په غرمه، د میزان په شپږمه، د هرات ښار په اتمه ناحیه کې د طالبانو یوه امنیتي پوسته د چاودنې هدف ګرځېدلې ده.

بریانیوز- دوشنبه، ٦ میزان ١٤٠٥

دغه امنیتي پوسته د هرات ښار په یوه له ګڼې ګوڼې ډکه سیمه، «جکان» کې موقعیت لري.

د عیني شاهدانو په وینا، په دې پېښه کې لږ تر لږه پنځه کسان ټپیان شوي چې یوه ښځینه لاروی هم پکې شامله ده. سرچینې وايي، د طالبانو څلور غړي هم په چاودنه کې ټپیان شوي دي.

د سرچینو په خبره، طالبان له چاودنې سمدستي وروسته د پېښې ځای ته رسېدلي او ټپیان یې روغتون ته انتقال کړي دي.

تر اوسه د طالبانو چارواکو د پېښې په اړه رسماً څه نه دي ویلي.

د چاودنې دقیق ډول لا هم نه دی روښانه، خو عیني شاهدان وايي چې ښايي پېښه د یوه نښلوونکي ماین، یا چسپکي ماین، د چاودنې له امله رامنځته شوې وي.

جکان د هرات ښار په اتمه ناحیه کې موقعیت لري او د هرات د والي له دفتر څخه شاوخوا دوه کیلومتره واټن لري.

تر دې دمه هېڅ ډلې د دې پېښې مسؤلیت نه دی منلی.