د ننګرهار اقتصاد رئیس د فساد د زمینه برابرولو لپاره د خپلوانو پر مقررۍ تورن دی

اشتراک گذاری:

د ننګرهار د اقتصاد رئيس مولوي جان محمد حامد، د دغه ریاست د څارونکي ټیم د نظارت صلاحیت ترې اخیستی او خپل تازه مقرر شوي وراره، «شاه وزیر»، ته یې سپارلی دی.

بریانیوز- دوشنبه، ٦ میزان ١٤٠٥

د ترلاسه شویو معلوماتو له مخې، شاه وزیر د بالمقطع کارکوونکي په توګه د ننګرهار د اقتصاد په ریاست کې مقرر شوی او د قراردادونو په برخه کې ورته د ځانګړي صلاحیت زمینه هم برابره شوې ده.

سرچینې وايي، د یاد ریاست د قراردادونو لپاره یوه مشخصې کړۍ جوړه شوي ترڅو فساد ته لار هواره کړی.

همداراز د ننګرهار د اقتصاد رئیس د ریاست په بېلابېلو برخو کې یو شمېر خپلوان، چې پکې ورېرونه او خوریونه هم شامل دي، د محافظ، اجیر او نورو بستونو په توګه ګومارلي دي.

د سرچینو په وینا، په دې ریاست کې د فساد په اړه مخکې هم شکایتونه مطرح شوي او د طالبانو د ننګرهار والي دفتر ته هم په دې اړه راپورونه رسېدلي دي.