اقتصاد

سوداګرۍ: افغانستان ته د قزاقستان د غلو صادرات څلور برابره زیات شوي

اشتراک گذاری:

(بریانیوزپنجشنبه (۹/ میزان /۱۴۰۵هـ.ش

افغانستان ته د قزاقستان د غلو دانو صادرات د روان زېږدیز کال په لومړیو اتو میاشتو کې د پام وړ زیات شوي او د تېر کال د ورته مودې په پرتله څلور برابره لوړ شوي دي

د قزاقستان د ټرانسپورت وزارت د معلوماتو له مخې، په دې موده کې افغانستان ته د غلو دانو صادرات ۶۵۵ زره ټنو ته رسېدلي دي. د دغه هېواد د ټرانسپورت وزارت مرستیال ژانیبک تایژانوف وايي، په تېرو اتو میاشتو کې د اوسپنې پټلۍ له لارې د توکو د لېږد کچه هم ۱۳ سلنه لوړه شوې ده

د سوداګرۍ د حجم دغه زیاتوالی د افغانستان او قزاقستان ترمنځ د اقتصادي اړیکو د پراخېدو له مهمو نښو څخه بلل کېږي، په ځانګړي ډول د خوراکي توکو او کرنیزو محصولاتو په برخه کې

قزاقستان په وروستیو کلونو کې هڅه کړې چې خپلې سوداګریزې او ترانزیټي لارې د سوېلي بازارونو پر لور پراخې کړي او د سیمې له هېوادونو سره د توکو د لېږد او سوداګرۍ کچه لوړه کړي

بلخوا، په افغانستان کې هم د منځنۍ اسیا له هېوادونو سره د اقتصادي اړیکو پراختیا ته پاملرنه زیاته شوې ده. د دواړو لورو ترمنځ د سوداګرۍ، ټرانزیټ او اوسپنې پټلۍ له لارې د توکو د لېږد پراخېدل کولی شي د سیمې د سوداګریزو اړیکو د لا پیاوړتیا زمینه برابره کړي