اخبار جهان

اسلام‌اباد: په اسلام‌اباد کې د افغانستان د سولې او روان وضعیت په اړه دوه ورځنی کنفرانس پیل شو

اشتراک گذاری:

(بریانیوزپنجشنبه (۹/ میزان /۱۴۰۵هـ.ش

د پاکستان په پلازمېنه اسلام‌اباد کې د افغانستان د روان وضعیت، امنیتي ننګونو او سولې ته د رسېدو پر لارو د بحث لپاره دوه ورځنی کنفرانس پیل شوی دی

دغه غونډه د «افغانستان ستونزمن وضعیت او د سولې لار» تر سرلیک لاندې جوړه شوې او د افغانستان د پخواني جمهوري نظام یو شمېر سیاسي څېرې او د اوسني حکومت مخالف کسان په کې ګډون لري. په ګډونوالو کې د بامیان پخوانی والي طاهر زهیر او د ولسي جرګې پخوانی غړی امان‌الله پیمان هم شامل دي

په کنفرانس کې د افغانستان پر امنیتي او اقتصادي وضعیت، د سولې پر امکاناتو، د پولو پر امنیت، سوداګرۍ، ترانزیټ او له سیمه‌ییزو هېوادونو سره د اړیکو پر څرنګوالي خبرې کېږي. د چین، روسیې، تاجکستان او د منځنۍ اسیا د یو شمېر نورو هېوادونو استازو هم په دې غونډه کې حضور موندلی دی

د غونډې په پرانیستونکې وینا کې د پاکستان د اطلاعاتو وزیر پر اوسني افغان حکومت نیوکې وکړې او ویې ویل چې باید د یوه وسله‌وال خوځښت پر ځای د یوه دولت په توګه فکر او عمل وکړي. نوموړي ټینګار کړی چې د دواړو هېوادونو ترمنځ د ستونزو د حل لپاره سیاسي اراده او خبرو اترو ته اړتیا ده

د کنفرانس جوړوونکي وايي، موخه یې دا ده چې د افغانستان د اوسني وضعیت په اړه د بېلابېلو لورو نظرونه واورېدل شي او د سولې او ثبات لپاره د ممکنه لارو په اړه سیمه‌ییز او نړیوال بحث رامنځته شي

د افغانستان په اړه دا ډول غونډې په داسې وخت کې ترسره کېږي چې د هېواد روان سیاسي وضعیت، له ګاونډیو سره اړیکې، امنیتي اندېښنې او د سولې د راتلونکې په اړه بحثونه لا هم د سیمه‌ییزو او نړیوالو ناستو له مهمو موضوعاتو څخه دي