افغانستان: د غره ښوېدو له امله د کابل ـ جلال‌اباد لویه لاره تړل شوې

اشتراک گذاری:

(بریانیوزپنجشنبه (۹/ میزان /۱۴۰۵هـ.ش

د کابل ـ جلال‌اباد پر لویه لاره د «تنګي غارو» په سیمه کې د غره ښوېدو له امله د موټرو تګ راتګ درول شوی او مسافر له دې مهم ترانزیټي مسیر څخه د لنډمهال لپاره له تېرېدو منع شوي دي

د ټولګټو چارو وزارت وايي، د غره د ښوېدو له امله د لارې یوه برخه بنده شوې او د سړک د پاکولو او بېرته پرانیستلو لپاره یې تخنیکي ډلې سیمې ته استولې دي

چارواکو له خلکو غوښتي چې تر بلې خبرتیا پورې له یادې لارې له تګ راتګ ډډه وکړي، څو د احتمالي نورو ښوېدنو له خطر سره مخ نه شي

د معلوماتو له مخې، که د خلکو تګ راتګ ته اړتیا وي، مسافر کولای شي له فرعي لارو څخه استفاده وکړي؛ خو د اصلي لارې د پرانیستل کېدو تر وخته به د موټرو تګ راتګ له ستونزو سره مخ وي

کابل ـ جلال‌اباد لویه لاره د هېواد له مهمو مواصلاتي مسیرونو څخه ده چې پلازمېنه له ختیځو ولایتونو او د تورخم له لارې له پاکستان سره نښلوي. د غرنیو سیمو له امله دغه مسیر وخت ناوخت د غره ښوېدو، واورې ښوېدنې او نورو طبیعي پېښو له کبله تړل کېږي

د لارې پرله‌پسې تړل کېدو د مسافرو او سوداګرو د ستونزو ترڅنګ، د کابل او ختیځو ولایتونو ترمنځ پر تګ راتګ او د توکو پر لېږد هم اغېز کړی دی. ځینې خلک ټینګار کوي چې د لنډمهالو اقداماتو ترڅنګ، د دې لارې د ورته ستونزو لپاره د دایمي حل موندلو ته اړتیا ده