مقاله

برلین/ واشنګټن: د جرمونو نړیوالې محکمې ملاتړ ته دوام ورکوو

اشتراک گذاری:

(بریانیوزپنجشنبه (۹/ میزان /۱۴۰۵هـ.ش

جرمني وايي، د امریکا د ولسمشر ډونالډ ټرمپ له مخالفتونو سره سره به د جرمونو د نړیوالې محکمې ملاتړ ته دوام ورکړي او له دې بنسټ سره به خپلې همکارۍ ونه دروي

د جرمني د بهرنیو چارو وزیر یوهان وادېفول ویلي، برلین د دغې محکمې د فعالیتونو ملاتړ مهم بولي او نه غواړي د امریکا د فشارونو له امله له هغې څخه واټن واخلي

نوموړي ویلي چې جرمني له جاپان وروسته د جرمونو د نړیوالې محکمې دویم لوی مالي تمویلوونکی دی او هېواد یې غواړي د نړیوال عدالت د پیاوړتیا لپاره خپل رول ته دوام ورکړي

د جرمني د بهرنیو چارو وزیر ټینګار کړی چې برلین غواړي په هغو قضیو کې د عدالت د پلي کېدو زمینه برابره شي چې ملي محکمې یې د څېړلو او حل کولو توان نه لري

دا څرګندونې وروسته له هغې کېږي چې د امریکا ولسمشر په وروستیو کې له هېوادونو غوښتي چې له جرمونو نړیوالې محکمې څخه ووځي. واشنګټن پر دې بنسټ نیوکې کړې او د هغې د ځینو اقداماتو او قضايي صلاحیتونو په اړه یې مخالفت څرګند کړی دی

جرمني بیا ټینګار کوي چې د نړیوالو جدي جرمونو د څېړنې او د حساب ورکونې لپاره نړیوال قضايي میکانیزمونه اړین دي او په هغو مواردو کې چې په کور دننه عدالت نه شي تأمینېدای، د نړیوالې محکمې رول مهم پاتې کېږي