د امریکا په ټنېسي ایالت : د اعدام هڅه ناکامه شوه؛ محکومه ښځه له دوو مرګونو پېچکارو وروسته هم ژوندۍ پاتې شوه

د امریکا په ټنېسي ایالت :  د اعدام هڅه ناکامه شوه؛ محکومه ښځه له دوو مرګونو پېچکارو وروسته هم ژوندۍ پاتې شوه

(بریانیوزشنبه(۱۱/ میزان /۱۴۰۵هـ.ش

د امریکا په ټنېسي ایالت کې د مرګ په سزا محکومه کریستا پایک له هغې وروسته هم ژوندۍ پاتې شوې چې د اعدام د عملي کولو پر مهال ورته دوه ځله د مرګونې دوا پېچکاري ورکړل شوه

د راپورونو له مخې، پایک ته د پینټوباربیتال دوه ډوزه ورکړل شول، خو له دواړو پېچکاریو وروسته یې زړه لا هم درزېده او ساه یې اخیستله. نوموړې وروسته په امبولانس کې روغتون ته ولېږدول شوه او د راپورونو له مخې په نازک روغتیایي حالت کې تر درملنې لاندې ده

د هغې مدافع وکیلانو ویلي چې د اعدام د ډلې غړو د رګ موندلو لپاره نږدې یو ساعت هڅه کړې او یوازې د هغې په چپ لاس کې څو ځله ستنې لګول شوې دي. د وکیلانو په وینا، د دویمې پېچکارۍ وروسته هم نوموړې ژوندۍ وه او د لاس له سخت درد څخه یې شکایت کړی و

بلخوا، د ایالت د زندانونو ادارې ویلي چې د اعدام ټول پړاوونه د ټاکل شوې تګلارې له مخې ترسره شوي دي. چارواکو تر اوسه په ډاګه نه کړه چې ولې د مرګونې دوا له دوو ډوزونو وروسته هم اعدام بشپړ نه شو

د دغې پېښې وروسته د ټنېسي والي بیل لي د ۲۰۲۶ کال تر پایه په دغه ایالت کې د ټولو اعدامونو د ځنډولو امر کړی او د پېښې د څرنګوالي د معلومولو لپاره یې د یوې خپلواکې او هر اړخیزې څېړنې غوښتنه کړې ده. د یوه بل بندي، ګېري ساتن، د اعدام حکم هم چې ټاکل شوې وه د روان کال په وروستیو کې عملي شي، تر بلې پرېکړې پورې ځنډول شوی دی

کریستا پایک په ۱۹۹۵ کال کې د ۱۹ کلنې کولین سلیمر د وژنې په قضیه کې د مرګ په سزا محکومه شوې وه. هغه مهال پایک ۱۸ کلنه وه. د هغې د اعدام هڅه د ټنېسي په ایالت کې د روان کال دویمه داسې پېښه ده چې چارواکي پکې د مرګ سزا په عملي کولو کې پاتې راغلي دي؛ تر دې وړاندې د مې په میاشت کې د ټوني کاروترز اعدام هم د رګ د موندلو د ستونزې له امله ودرول شو