اخبار جهان

اسلام آباد/ انقره: پاکستان او ترکیې د ترهګرۍ او سازمان‌یافته جرمونو پر ضد تړون لاسلیک کړ

اشتراک گذاری:

(بریانیوز شنبه (۱۸/ میزان /۱۴۰۵هـ.ش

پاکستان او ترکیې د ترهګرۍ، د نشه‌يي توکو د قاچاق او سازمان‌یافته جرمونو پر وړاندې د ګډې مبارزې او امنیتي همکاریو د پراختیا لپاره یو تړون لاسلیک کړی دی. دغه هوکړه د جمعې په ورځ، د اکتوبر پر نهمه، په استانبول کې د دواړو هېوادونو د کورنیو چارو وزیرانو ترمنځ لاسلیک شوه

د پاکستان د کورنیو چارو وزیر محسن نقوي او د ترکیې د کورنیو چارو وزیر مصطفی چفتچي د لیدنې پر مهال د دواړو هېوادونو ترمنځ د امنیتي همکاریو پر پیاوړتیا او د پولیسو د ادارو ترمنځ د همغږۍ پر پراختیا خبرې وکړې

د هوکړې له مخې، دواړه هېوادونه به د ګډې کاري ډلې په جوړولو سره د کورنیو چارو وزارتونو ترمنځ همکاري پیاوړې کړي. همدارنګه، د سایبري جرمونو پر وړاندې مبارزه، د نشه‌يي توکو د قاچاق مخنیوی، د پولیسو روزنه او د تخنیکي کارپوهانو تبادله به د همکاریو له مهمو برخو څخه وي

د ترکیې د کورنیو چارو وزیر ویلي، له پاکستان څخه ترکیې ته د ناقانونه کډوالۍ کچه له ۷۰ سلنې څخه ۱۷ سلنې ته راټیټه شوې ده. هغه د ناقانونه کډوالۍ د شبکو پر وړاندې د پاکستان اقدامات ستایلي دي. خو په خپرو شویو معلوماتو کې د دې سلنې د محاسبې د مودې په اړه جزئیات نه دي ورکړل شوي

د پاکستان د کورنیو چارو وزیر خپل ترکي سیال ته د ناقانونه کډوالۍ د مخنیوي لپاره د اسلام‌اباد د اقداماتو په اړه معلومات ورکړي او د دواړو هېوادونو ترمنځ یې د ګډو هڅو پر دوام ټینګار کړی دی

دا تړون په داسې وخت کې لاسلیک کېږي چې پاکستان او ترکیه هڅه کوي د ناقانونه کډوالۍ، انسان‌قاچاق، نشه‌يي توکو او د پولو هاخوا فعالیت کوونکو جرمي شبکو پر وړاندې خپلې همکارۍ پراخې کړي