– د پاکستان او قطر تر منځ د اقتصادي او سوداګريزو اړيکو د پياوړتيا په موخه د نوې اقتصادي دور پيل قطر او پاکستان درې ميليارده ډالره پانګونه‌ليک لاسليک کړ

اسلام‌اباد – د پاکستان او قطر تر منځ د اقتصادي او سوداګريزو اړيکو د پياوړتيا په موخه، دواړو هېوادونو د پنجشنبې په ورځ يو مهم او تاريخي هوکړه‌ليک لاسليک کړ

 د دې تړون له مخې، قطر به په پاکستان کې درې ميليارده امريکايي ډالره پانګونه کوي، چې تمه ده د هېواد اقتصاد ته تازه وینه ورکړي

دغه تړون د دواړو هېوادونو د اقتصادي، سوداګريزو او تخنيکي همکاريو د وزيرانو ګډې کمېټې د شپږمې ناستې په پای کې لاسليک شو. د پاکستان د سوداګرۍ وزير جمال کمال خان او د قطر د سوداګرۍ او صنعت وزير شيخ فيصل بن ثاني آل ثاني د تړون سندونه لاسليک کړل

د پاکستان د سوداګرۍ وزارت وايي، دا هوکړه د قطر د امير د پخوانۍ ژمنې د عملي کولو په موخه شوې ده، چې له مخې به د دواړو هېوادونو تر منځ د پانګونې، سوداګرۍ او پرمختيايي همکاريو لاره نوره هم پراخه شي

د يادې هوکړې له مخې، د قطر درې ميليارده ډالره پانګونه به د انرژۍ، بندرونو، ترانسپورت، زېربنا او ټيکنالوژۍ په برخو کې وشي. تمه کېږي دا پانګونه نه يوازې د پاکستان د اقتصاد د ثبات لامل شي، بلکې زرګونه کسانو ته به د کار زمينه هم برابره کړي 

وزير جمال کمال خان وويل:

دا تړون د پاکستان لپاره د يو نوي اقتصادي فصل پيل دی. موږ له قطر سره د باور، ورورولۍ او ګډ پرمختګ پر بنسټ ولاړې اړيکې لرو

د قطر د سوداګرۍ او صنعت وزير، شيخ فيصل بن ثاني آل ثاني، هم وويل چې قطر غواړي د پاکستان له اقتصادي ودې او ثبات سره اوږدمهاله همکاري ولري. ده زياته کړه:

پاکستان د سيمې يو مهم اقتصادي مرکز دی، او موږ باور لرو چې ګډې پانګونې به د دواړو هېوادونو خلکو ته د سوکالۍ دروازې پرانیزي

شنونکي وايي، دا تړون د پاکستان لپاره د سيمه‌ييزې همکارۍ يوه مهمه بريا ده، چې د خليج هېوادونو له لوري د اعتماد او اقتصادي شريکتوب يو نوی فصل پرانیزي