کابل ـ دهلي کې نوې اقتصادي هوکړه؛ په سفارتونو کې د تجارتي اتشه‌ ګانو ګمارنه د سوداګرۍ د پراختیا لپاره

 د طالبانو د صنعت او سوداګرۍ وزارت خبر ورکړی چې افغانستان او هند د دواړو هېوادونو په سفارتونو کې د ځانګړو تجارتي اتشه‌ګانو د ټاکلو پر سر هوکړې ته رسېدلي دي. دا اقدام د دواړو هېوادونو د اقتصادي اړیکو پیاوړتیا، د سوداګرۍ د ودې او د ګډو پروژو د پراختیا په موخه شوی دی

د وزارت په وینا، دا پرېکړه د طالبانو د صنعت او سوداګرۍ وزیر د هند د تجارت او صنعت د دولت له وزیر سره د کتنې پر مهال نهايي شوې ده. په دې غونډه کې دواړو خواوو د اقتصادي همکارۍ د زیاتولو، د صادراتو د پراختیا، او د ترانزیټي لارو د اسانتیا په اړه مفصلې خبرې کړي دي

مثبت اړخونه او اقتصادي فرصتونه

د ټاکل کېدونکو تجارتي اتشه‌ګانو رول به دا وي چې د افغان سوداګرو ستونزې هوارې کړي، د دوه‌اړخیزې سوداګرۍ جریان آسانه کړي، او نوي بازارونه پرانیزي. شنونکي باور لري چې د دې ګام عملي کېدو سره به د افغان تولیداتو لپاره د هند لوی بازار یو ځل بیا فعال شي او اقتصادي همکاریو ته نوی قوت ورکړل شي.

اندېښنې او منفي اړخونه

خو په دې برخه کې ځینې اندېښنې هم شته:

سره له دې چې هوکړه د اقتصادي پرمختګ لپاره مهمه ده، خو د افغانستان د بانکي محدودیتونو، نړیوالو بندیزونو، او د طالبانو د حکومت د رسمي نه پېژندلو ستونزې د دې پروسې پر وړاندې لوی خنډونه جوړوي. شنونکي وایي، که دا ستونزې حل نه شي، نو د تجارتي اتشه‌ګانو اغېز محدود پاتې کېدای شي

په هر حال، دواړه هېوادونه هڅه کوي چې د اقتصادي اړتیاوو پر بنسټ خپلې اړیکې پیاوړې کړي او د سیمې په کچه نوي سوداګریز فرصتونه رامنځته کړي