چین خپلو اتباعو ته ګواښ وکړ: د تاجیکستان – افغانستان له پوله سمدستي ووځئ

د تاجیکستان په پوله د امنیتي ګواښونو د زیاتېدو له امله، د چین سفارت په دوشنبه کې خپلو اتباعو ته په بیړني ډول خبرداری ورکړی چې د افغانستان سره نږدې سیمې دې فوراً پرېږدي. دا خبرداری د هغو پېښو په لړ کې ورکول کېږي چې په ترڅ کې یې نور دوه چيني وګړي د پولو په سیمه کې وژل شوي دي

 د بریدونو پرله‌پسې زیاتوالی؛ د اندېښنې نوې څپه

د رسمي سرچینو په وینا، په وروستیو اوونیو کې په تاجیکستان کې د چینایي اتباعو پر ضد مشکوک بریدونه زیات شوي، او د پېښو تکرار د بیجینګ لپاره د جدي امنیتي اندېښنو لامل ګرځېدلی دی. د چین سفارت ویلي چې د لېرې پرتو سرحدي سیمو امنیت د باور وړ نه دی او اتباع یې باید بې‌له ځنډه خوندي ځایونو ته انتقال شي

شنونکي وایي چې دغه بریدونه کېدای شي د ناقانونه وسله‌والو ډلو، قاچاقبرو یا هغو حلقو کار وي چې په سیمه کې د بهرنیانو حضور د ځان لپاره خطر ګڼي

 له پاکستان څخه د بدیل اقتصادي شریک په لټه کې طالبان؛ حساسیتونه زیات شوي

دغه پېښې په داسې مهال رامنځته کېږي چې د طالبانو حکومت هڅه کوي د پاکستان پر ځای له منځنۍ آسیا او ځانګړي ډول له چین سره اقتصادي اړیکې پراخې کړي. خو د سیمې د امنیتي وضعیت خرابوالی د دې هڅو پر وړاندې لوی خنډ بلل کېږي

کارپوهان باور لري چې د چینایي اتباعو پر ضد پرله‌پسې بریدونه نه یوازې د چین پانګه‌والو لپاره د اعتماد فضا خرابوي، بلکې د طالبانو لپاره هم لوی سیاسي فشار جوړوي؛ ځکه چې هغوی غواړي افغانستان د سیمه‌ییز اقتصادي دهلیز مهمه برخه وښيي

 بیجینګ: امنیتي وضعیت جدي څارو

د چین سفارت ویلي چې د وضعیت څارنه روانه ده او هر ډول ناامنۍ ته به ژر تر ژره عکس‌العمل وښيي. همداراز، سفارت خپلو اتباعو ته سپارښتنه کړې چې له سفر کولو ډډه وکړي او د اضطراري حالت په صورت کې له دیپلوماتیک مأموریت سره په تماس کې شي.

د سیمه‌ ییزو سرچینو په وینا، د سرحدي سیمو امنیتي ځواکونه تېره یوه اوونۍ په لوړ پوړه چمتووالي کې ساتل شوي دی