د ټرمپ سخت ضرب‌الاجل مادورو ته؛ واشنګټن د ونزوېلا د بحران پر سر نوي څپې ته ورنژدې کېږي

په داسې حال کې چې د ونزوېلا سیاسي کړکېچ ورځ تر بلې ژورېږي، د امریکا ولسمشر ډونالډ ټرمپ له خپل ونزوېلايي سیال نیکولاس مادورو سره د یوې تلیفوني اړیکې پر مهال داسې خبرداری ورکړی چې د نړیوالو سیاستونو فضا یې په یوه شېبه کې تاوده کړې ده. د سرچینو په وینا، ټرمپ مادورو ته ویلي چې تر راتلونکې جمعې پورې باید ونزوېلا پرېږدي؛ یو شرط چې د کاراکاس لپاره د سختو ضرب‌الاجلونو تر ټولو جدي پیغام بلل کېږي.

 سخت دریځ، توند پیغام

سرچینې وایي، ټرمپ د خبرو پر مهال مادورو ته په ښکاره ویلي چې د ونزوېلا د اقتصادي سقوط، د میلیونونو خلکو د بې‌وزلۍ، د بشري ستونزو او سیاسي ګډوډۍ اصلي مسؤلیت د هغه پر غاړه دی. د دغو سرچینو په وینا، ټرمپ ټینګار کړی چې واشنګټن به د دې وضعیت د پای ته رسولو لپاره له هر هغه «وسیله» کار واخلي چې لازم یې وګڼي

په واشنګټن کې ځینې شنونکي دا ګام د امریکا له لوري د فشار تر ټولو لوړه کچه ګڼي؛ هغه کچه چې کولای شي د سیمې د سیاست نوې کرښه رسم کړي

 کاراکاس لا چوپه خوله، خو تر شا غږونه جګ دي

د مادورو حکومت لا تر دې دمه د دغو ادعاوو په تړاو کوم رسمي غبرګون نه‌دی ښودلی، خو د ونزوېلا د واکمن ګوند ځینې غیر رسمي سرچینې وایي چې «هیڅ بهرنی هېواد نشي کولای د ونزوېلا د واکمنۍ سرنوشت وټاکي

سره له دې، کارپوهان وایي چې د ټرمپ وروستی دریځ د مادورو پر حکومت یو نوی سیاسي سیوری غوړولی او ښايي په راتلونکو ورځو کې د ونزوېلا په سیاسي حرکاتو کې د پام وړ بدلونونه رامنځته کړي

 د کالونو ناختمېدونکی بحران

ونزوېلا له ډېرې مودې راهیسې د اقتصادي سقوط، خورا لوړې افراط زر، د خوړو او درملو کمښت، او پراخو ولسي اعتراضونو شاهد دی. په میلیونونو خلک له هېواده بهر وتلي او نړیوال سازمانونه د هېواد حالت د «انساني ناورین» په نوم یادوي

شنونکي باور لري چې د ټرمپ وروستی خبرداری به د کاراکاس پر کمزوري اقتصادي وضعیت او داخلي فشارونو نور هم بار زیات کړي، او ښايي داسې سیاسي تحولونه رامنځته کړي چې پایله یې د سیمې جیوپولټیک وضعیت بدل کړي

 د سیمې او نړۍ سترګې پر ونزوېلا

په داسې حال کې چې د مادورو او ټرمپ اړیکې د سختو بیانونو او متقابلو تورونو ډګر ته تللې دي، نړیواله ټولنه د بحران د پای ته رسولو لپاره د هر نوي حرکت څارونکې ده. اروپايي هېوادونه، امریکايي کانګرس، سیمه‌ییز حکومتونه او د امریکایانو د لاتیني ټولنې مشران له نږدې ګوري چې د جمعې تر ضرب‌الاجله پورې به څه پېښېږي

ځینې کتونکي خبرداری ورکوي که مادورو د دې ضرب‌الاجل پر وړاندې نرمښت و نه ښيي، ښايي ونزوېلا د نوې کړکېچمنې دورې پر لور وخوځېږي—چې اغېز به یې نه یوازې د دې هېواد، بلکې د ټوله سیمې پر راتلونکي هم ولګېږي