د ښځو د سپورټ د منع په بدل کې د نړیوال المپیک کلک غبرګون؛ له افغانستان سره څلور کلن مالي ملاتړ پرې شو

کابل – د افغانستان د المپیک ملي کمېټې مشر احمدالله وثیق تایید کړې چې د نړیوال المپیک کمېټې له څلورو کلونو راهیسې ټول هغه مالي ملاتړ بند کړی چې د کورنیو ورزشي سیالیو، پروګرامونو او اساسي فعالیتونو لپاره یې ورکولو. د دې پرېکړې اصلي لامل د طالبانو له لورې د ښځو پر سپورټ سخت بندیز او د نړیوالو ورزشي اصولو د سرغړونې دوام بلل شوی دی

پر نړیوالې کچې د المپیک منشور په نړۍ کې د برابر ګډون، د تبعیض نشتوالی، او د ښځو د فعاله ونډې لپاره جوړ شوی. خو افغانستان د ۲۰۲۱ کال وروسته له دې ټولو ارزښتونو په څرګند ډول واوښت، ځکه:

د ښځو ټول ورزشي فعالیتونه بند شول

ښځینه لوبغاړي له روزنې، سیالیو او سفره محرومې شوې

نجلۍ د لوبغالو، جمونو او حتی د ساده ورزشي تمرین اجازه نه لري

د ښځو ورزشي فدراسیونونه په بشپړ ډول غیر فعال شوي

د نړیوال المپیک کمېټه وایي تر هغو چې افغانستان د دې اصولو درناوی ونه کړي، هېڅ ډول مالي او تخنیکي مرسته نه شي دوام ورکولای.

 د مالي ملاتړ بشپړ بندېدل؛ څه اغېزې لري؟

احمدالله وثیق وايي چې اوس یوازې هغو افغان ورزشکارانو ته لږ ملاتړ ورکول کېږي چې باید نړیوالو سیالیو ته واستول شي، خو د کور دننه:

د ملي لوبډلو د جوړېدو پروسه ټکنۍ شوې

د کورنیو سیالیو تنظیم له جدي کمښت سره مخ دی

د ورزشي تجهیزاتو، استادانو او لوبغالو د فعالیت لپاره هېڅ بودیجه نشته

د ځوانانو او نوباوو لپاره د روزنې فرصتونه له منځه تللي

د سپورټ متخصصین باور لري چې دغه وضعیت د افغانستان د ورزش د راتلونکي بنسټونه زیانمنوي او هېواد له نړیوال ورزشي ډګر څخه ورو ورو څنډې ته تیلېږي.

 د ښځو غږ لاهم چوپ دی

یوه پخوانۍ افغان ورزشکارې چې د امنیتي دلایلو له کبله نوم نه اخلي، وایي:

موږ چې کلونه یې په نړیوالو سیالیو کې د افغانستان بیرغ پورته کړی و، نن حتی د کور دننه د تمرین اجازه نه لرو. دا یوازې د سپورټ نه؛ دا د نسلونو د ارمانونو مرګ دی

 نړیوال فشارونه زیاتېږي

نړیوال المپیک، د ښځو حقونو سازمانونه، او ګڼ هېوادونه له طالبانو غواړي چې د ښځو په وړاندې دغه بندیزونه لرې کړي. IOC څو ځلې طالبانو ته خبرداری ورکړی چې که وضعیت همداسې دوام وکړي:

د افغانستان نوم د المپیک له لست څخه حذفېدلی شي

ورزشکاران به د بې بیرغه او انفرادي په توګه ګډون ته مجبور شي

نړیوالې مرستې به بشپړ بندېږي

 د افغانستان د سپورټ راتلونکی؛ تر ټولو تیاره پړاو

کارپوهان وایي تر هغو چې ښځې بیا سپورټ ته ستنې نه شي، افغانستان نه شي کولای د نړیوال ورزشي کورنۍ برخه پاتې شي.

دوی زیاتوي چې له ښځو پرته سپورټ نیمګړی، بې‌اعتباره او د پرمختګ توان نه لري

افغانستان په داسې مهال له نړیوال ایزولېشن سره مخ دی چې زرګونه ځوانان، ښځې او نجونې د ورزش له لارې خپل ژوند بدلول غوښتل، خو اوس یوازې د تمې په تیارو کې پاتې دي