اسلام‌اباد / کابل – له افغانستان سره د پاکستان صادرات په شپږو میاشتو کې ۵۶ سلنه راکم شوي؛ سرحدي ترینګلتیاوې او اقتصادي بې‌ثباتي سوداګرۍ ته سخت زیان اړولی

 بریانیوز:(دوشنبه ۶دلو۱۴۰۴)  اسلام‌اباد / کابل – د پاکستان مرکزي بانک اعلان کړی، چې له افغانستان سره د دغه هېواد د صادراتو کچه د روان مالي کال ۲۰۲۶ په لومړۍ نیمایي کې په بې‌ ساري ډول راټیټه شوې او د تېر کال د همدې مودې په پرتله شاوخوا ۵۶ سلنه کموالی ښيي

د یاد بانک د تازه شمېرو له مخې، د پاکستان صادرات افغانستان ته د روان مالي کال په لومړیو شپږو میاشتو کې ۲۱۹ میلیون امریکایي ډالرو ته رسېدلي، حال دا چې دا رقم تېر کال د پام وړ لوړ و. اقتصادي شنونکي دا کمښت د دواړو لوریو ترمنځ د سیاسي ترینګلتیاوو، سرحدي نښتو او د سوداګریزو لارو د پرله‌پسې تړل کېدو پایله بولي

 د پاکستان مرکزي بانک په خپل راپور کې ویلي، چې د تېر کال د میزان په میاشت کې د پاکستان او د طالبانو د ادارې ترمنځ سرحدي شخړو او امنیتي پېښو، د دواړو هېوادونو ترمنځ د سوداګریزو تګ‌راتګونو بهیر سخت ګډوډ کړ. د راپور له مخې، د مهمو سرحدي لارو تړل کېدو نه یوازې صادرات او واردات وځنډول، بلکې زرګونه سوداګر، ترانزیتي شرکتونه او د سرحدي سیمو اوسېدونکي یې له مستقیم اقتصادي زیان سره مخ کړل

 د اقتصادي چارو کارپوهان وایي، افغانستان چې له وړاندې د وارداتو پر اقتصاد ولاړ هېواد دی، د سوداګریزو لارو هر ډول بندښت یې د خوراکي توکو، سون‌توکو او لومړنیو اړتیاوو بیې لوړې کړې او د خلکو پر ورځني ژوند یې ناوړه اغېز کړی دی. د هغوی په باور، د پاکستان صادراتو کمښت د افغانستان په بازارونو کې د توکو کمښت او د بیو بې‌ثباتي لا زیاته کړې ده

 شنونکي زیاتوي، چې د طالبانو د ادارې له‌خوا د روښانه اقتصادي پالیسیو نشتون، د سوداګرو لپاره د باور فضا کمزورې کړې ده. د پانګونې د خوندیتوب تضمین نه‌شتون، د مالیاتي او ګمرکي مقرراتو بې‌ثباتي او د سیاسي پرېکړو ناڅاپي بدلونونه، هغه عوامل دي چې نه یوازې له پاکستان سره، بلکې له نورو ګاونډیو هېوادونو سره یې هم د افغانستان سوداګریز موقعیت زیانمن کړی دی

 د سیمه‌ییزو اقتصادي اړیکو یو شمېر څېړونکي خبرداری ورکوي، که د سرحدي شخړو د حل، د سوداګرۍ د اسانتیاوو او د اعتماد د بیا رامنځته کولو لپاره عملي ګامونه وانخیستل شي، نو افغانستان به په سیمه‌ییزه سوداګرۍ کې لا ډېر منزوي شي. د هغوی په وینا، دا وضعیت کولای شي افغانستان د مهمو ترانزیتي دهلېزونو او اقتصادي همکاریو له فرصتونو محروم کړي

 له بلې خوا، د سوداګرو اتحادیې وایي، د سرحدونو تړل کېدل یوازې د لويو سوداګرو زیان نه دی، بلکې د سرحدي سیمو زرګونه کورنۍ چې د ورځني سوداګریز تګ‌راتګ له لارې عاید ترلاسه کوي، د بې‌روزګارۍ او فقر له جدي خطر سره مخ کوي

 اقتصادي شنونکي ټینګار کوي، چې د طالبانو اداره د خلکو د معیشت، سوداګرۍ د دوام او اقتصادي ثبات په برخه کې مسؤلیت لري او باید له سیاسي کړکېچونو د سوداګرۍ د قرباني کېدو مخه ونیسي. د هغوی په اند، د اقتصاد غیرسیاسي کول، له ګاونډیو هېوادونو سره د دوامدارو سوداګریزو اړیکو ساتل او د واضح اقتصادي تګلارو اعلان، د افغانستان د اقتصادي ژغورنې لپاره حیاتي ارزښت لري

د راپور په پایله کې راغلي، چې که روان وضعیت همداسې دوام وکړي، نه یوازې به د افغانستان او پاکستان ترمنځ سوداګري نوره هم زیانمنه شي، بلکې د افغانستان د خلکو پر ژوند، د خوراکي خوندیتوب او د هېواد پر اوږدمهاله اقتصادي راتلونکې به یې اغېزې لا ژورې شي