ازبیکستان: د افغانستان ثبات د سیمې له امنیت سره نه بېلېدونکی تړاو لري

بریانیوز:(دوشنبه ۶دلو۱۴۰۴)  تاشکند – د ازبیکستان د ولسمشر سلاکار، عبدالعزیز کاملوف، ویلي دي چې د منځني ختیځ په کچه د افراط‌ګرایۍ پراخېدل کولای شي د افغانستان امنیت او د مرکزي اسیا د هېوادونو ثبات په مستقیم ډول له جدي ګواښ سره مخ کړي. نوموړي ټینګار کړی، چې افغانستان د افراطي ډلو د نفوذ او خوځښت پر وړاندې یو له تر ټولو زیان‌ منو سیمو څخه دی او د دغه هېواد وضعیت د ټولې سیمې پر امنیت ژور اغېز لري

کاملوف دا څرګندونې د سیمې د امنیتي تحولاتو په اړه په خپلو وروستیو څرګندونو کې کړې دي او ویلي یې دي، چې د افغانستان امنیت یوازې د دې هېواد داخلي مسئله نه ده، بلکې د مرکزي او جنوبي اسیا د ثبات اساسي ستن بلل کېږي.

 د ازبیکستان د ولسمشر سلاکار ویلي:

«که چېرې په منځني ختیځ کې افراطي ډلې پیاوړې شي او د هغوی نفوذ نورو سیمو ته وغځېږي، نو دا به افغانستان او د مرکزي اسیا هېوادونه له نويو امنیتي ننګونو سره مخ کړي. له همدې امله، د افغانستان ثبات د سیمې له امنیت سره په نه بېلېدونکي ډول تړلی دی.»

 نوموړي زیاته کړې، چې د سیمې پر کچه امنیتي اندېښنې د دې لامل شوې، چې تاشکند د سولې او ثبات له نړیوالو نوښتونو ملاتړ وکړي، په ځانګړي ډول هغو طرحو ته مثبت نظر ولري چې د نړیوالو شریکانو، په شمول د امریکا متحده ایالاتو، له لوري ملاتړ کېږي. د هغه په وینا، ازبیکستان باور لري چې د افغانستان د اوږدمهاله ثبات لپاره باید همغږي نړیوالې او سیمه‌ییزې هڅې وشي

 کاملوف افغانستان د افراطي ډلو د جابه‌جایۍ، بیا منسجم کېدو او نفوذ لپاره یو حساس او زیان‌من هېواد بللی او ټینګار یې کړی، چې که د دغو ګواښونو د مهار لپاره ګډ اقدامات ونه شي، نو د سیمې امنیت به له اوږدمهاله خطرونو سره مخ شي

 د امنیتي چارو شنونکي وایي، د ازبیکستان دا دریځ د مرکزي اسیا د هېوادونو هغه پراخې اندېښنې څرګندوي، چې د افغانستان له وضعیت سره مستقیمه اړیکه لري. د هغوی په باور، د سرحدونو ګډ امنیت، د استخباراتي معلوماتو تبادله او د افراط‌ګرایۍ پر ضد ګډې ستراتیژۍ د سیمې د ثبات لپاره حیاتي ارزښت لري.

 شنونکي همدارنګه ټینګار کوي، چې افغانستان د جغرافیایي موقعیت له امله د سیمې د نښلولو مهم مرکز دی او هر ډول بې‌ثباتي په دغه هېواد کې کولای شي د افراطي ډلو د تګ‌راتګ، وسلوال فعالیتونو او ناامنۍ لمن نورو هېوادونو ته هم وغځوي

 د ازبیکستان حکومت له دې وړاندې هم څو ځله ټینګار کړی، چې د افغانستان د سولې او ثبات لپاره باید سیاسي حل‌لارې، اقتصادي همکاري او سیمه‌ییزه همغږي پیاوړې شي. د تاشکند په باور، یو باثباته افغانستان نه یوازې د امنیتي ګواښونو مخه نیسي، بلکې د اقتصادي دهلېزونو، سوداګرۍ او سیمه‌ییز اتصال لپاره نوي فرصتونه هم رامنځته کوي

د راپور په پایله کې ویل شوي، چې د ازبیکستان دا څرګندونې یو ځل بیا دا حقیقت روښانه کوي، چې د افغانستان راتلونکی یوازې د دې هېواد د خلکو موضوع نه ده، بلکې د ټولې سیمې د امنیت، ثبات او پرمختګ برخلیک ورسره تړلی دی