د امریکا د سنا د بهرنیو اړیکو کمېټې طالبانو ته «د امریکا د مرستو بندولو» لایحه تصویب کړه

اشتراک گذاری:

د امریکا د سنا د بهرنیو اړیکو کمېټې د پنجشنبې په ورځ (د دلو ۹مه) یوه لایحه تصویب کړه، چې له مخې به یې له افغانستان سره د امریکا مرستو ته د طالبانو لاسرسی په بشپړ ډول بند شي.

بریانیوز(جمعه،٩ دلو۱۴۰۴)

یاده لایحه چې «ترهګرو ته د مرستو بندولو لایحه» نومېږي، د دې لپاره طرحه شوې چې طالبان د هغو مالي مرستو څخه بې‌برخې شي، کومې چې د امریکا له لوري افغانستان ته لېږل کېږي. د دې کمېټې غړو په دې اړه ځانګړې ناسته وکړه او په پایله کې یې لایحه تصویب کړه.

د امریکا د سنا د بهرنیو اړیکو کمېټې رييس، جېم رېش، د لایحې له تصویبېدو وروسته په یوه اعلامیه کې وویل: «تر دې وروسته به د امریکا د مالیه ورکوونکو یو ډالر هم د طالبانو په ګډون په افغانستان کې ترهګرو ډلو ته ونه‌رسېږي.»

نوموړي ټینګار وکړ چې طالبان دا مهال د امریکا هغو مرستو ته لاسرسی لري چې افغانستان ته استول کېږي، او دا موضوع د هغو امریکايي سرتېرو له قربانیو سره په ټکر کې ده چې په افغانستان کې یې خپل ژوند له لاسه ورکړی دی.

تر دې مخکې ډيموکراټانو له دغې طرحې سره مخالفت کړی و او اندېښنه یې ښودلې وه، چې که د امریکا مرستې بندې شي، نو دا به په افغانستان کې پر اړمنو خلکو ناوړه اغېز وکړي.

دا په داسې حال کې ده چې د طالبانو ویاند، ذبیح‌الله مجاهد، تر دې وړاندې له طالبانو سره د امریکا د هر ډول مرستو ادعاوې رد کړې وې او ویلي یې وو چې دغه مرستې یوازې د بشري بنسټونو له لارې لګول کېږي او طالبان ترې ګټه نه اخلي.